Ժամանակագրութիւն

|78ա| Ի թվին ՅԼԴ [885] զԱշոտ Բագրատունի թագաւոր օծին, Գեորք կաթողիկոսին, հրամանաւ ամիրպետին ամիր Ահմատին խորհրդով Գրիգոր Սուփանայ Սիւնեցի իշխանի եւ միւս Գրիգորի Դերենկայ Արծրունեաց իշխանի, որ թագաւորեաց ամս Ե [5] եւ վախճանեցաւ։ Եւ նստաւ որդի նորա Սմբատ ի տեղի հօր իւրոյ, որ յետոյ նահատակեցաւ ի Յուսփայ։

Իսկ ի թվին ՅԾԸ [909] ի գալն Յուսփայ զօրավարին տաճկին, որդի Դերենկայ Արծրունոյն Գագիկ ապստամբեալ ի Սմբատ թագաւորէ, խորհրդով Յուսփայ, թագաւորէ ի Վասպուրականի։

Իսկ ի թվին ՅԿԲ [913] կացուցանի ասպարեզ եղբօր որդի Սմբատայ Աշոտ։ Եւ որդին Սմբատայ թագաւորի՝ Աշոտ կայսրն Ռոմանոս թագաւորեցուցանէ ի տեղի հօր իւրոյ յաշխարհս Հայոց։ Եւ իշխէին Բագրատունիք Շիրակայ եւ Այրարատու մինչ ի Գեղամ եւ մինչ ի Յուխտիսն եւ մինչ ի Կարին եւ մինչ ի սահմանս Վասպուրականի եւ մինչ ի Ձորոցգետն եւ մինչ ի Գարդման եւ Սիւնիս կատարեալ էր ի նոցանէ։ Ապա ի նուազեալ Բագրատունեաց թագաւորութեանն եւ ի զօրանալ ձեռին իսմայելականի հատեալ եւ բաժանեալ տեղին ամենայն գահ գլխաւոր նախարարացն եւ թագ կապեալ ինքեանց թագաւորեցին նախ Արծրունեաց Գագիկ եւ ապա Վրաց բդեշխն Ատրներսեհ եւ Աղվանից Համամ եւ Ձորոյգետեցիքն, որ Կիւրիկեանք կոչին նաեւ Կարուցն եւ Վանանդացն, որ Բասենեանք կոչին։

|78բ| Եւ ապա Սիսականք Սմբատ որդի Սահակայ որդւոյ Աշոտի, որ ունէր կին զՇահնդուխտ դուստր Սեւադա իշխանի Աղվանից եւ տուեալ էր զթոռն իւր ըզդուստր Վասակայ որդւոյ իւրոյ զԿադրմիտէ կին Գագկայ թագաւորի որդւոյ Աշոտի, որ շինեաց զսխրատեսիլն զմեծ Կաթուղիկէն յԱնի, հրամանաւ սուլթանին Խորասանու, թագաւորէ Սմբատ ի վերայ Սիւնեաց աշխարհի։

Ի թվին ՆՂԸ [1049] Վրաց թագաւորն Դաւիթ եւ Հայոց Գագիկ ի Վանանդ, Յունաց Մօնամախ զօրացն Վիրք եւ տիրեցին մերոյ աշխարհի, եւ Օրբելեանքն յառաջ եկին։

Ի ՈՀԳ [1224] թվին սկիզբն ելանելոյ թատարին եւ տիրելոյ բոլոր աշխարհիս։ Որոց յառաջ եկին եւ տիրեցին Չ [1251] թվին Ելիկումն եւ Սմբատ եւ Տարսայիճ որդիք Լիպարտին։

ՉԽԱ [1292] առաւ Հռօմկլայն ի Մսրայ սուլթանէն եւ կաթողիկոսն Ստեփանոս եւ ամենայն սրբութիւնք գերեցան։

Ի թվին ՉԽԶ [1297] էր աշխարհակալ Ղազանն եւ եպիսկոպոս Սիւնեաց Ստեփանոս Տարսայիճի որդի եւ եպիսկոպոս Թադեոսի Առաքելոյ[ն] Տիրացու, որ բազում նեղութիւն կրեաց յանօրինաց յաւերել տանց եւ շինուածոց վանից ի չարագլխէն Նավռուզայ։

Եւ թագաւոր Կիւլիկեայ տանն Հեթում բարեպաշտօն եւ հայրապետ Գրիգոր Անաւարզացին։

Ի ԶՃԽԶ [1197] թվին թագաւորեաց Լեւոն Բագրատունեաց ի Կիլիկիա։

Ի ԶՃԾԳ [653] թվին յետ ծննդեանն Քրիստոսի ելն Մահմատն։

Ի ԶՃՀԸ [1229] թվին Հայոց, ել թաթարն եւ գլխա[ւոր] զօրուն էր Չարմաղանն։

ԷՃԾԳ [1304] խարաճն եղաւ։

ԷՃԽԱ [1292] Հռօմկլայն աւերեցաւ։

ԷՃԾ [1301] Ղազան մեռաւ։

ԷՃԾԸ [1309] Ապուայիտն մեռաւ։