Ամարանոց Բիւզանդեան

536

Գիւղ երկայնաձիգ` առ ծովեզերին,

այլ ոչ յաճախեալ` իբրեւ զառաջին,

¹ յորժամ շինեցաւ` ձեռամբ դահիրին,

սիրելւոյն երրորդ` Մուսդաֆայ խանին:

537

² Սիգէտ ձայնեալ` առ յունաց ազգին,

յիւրոց թըզենեաց` առ յետագային,

իսկ սարաւանդակ` Պուռուն պաղչէսին,

Ըսդըռիտիօ` ձայնեալ առ նոսին:

538

Յանուն սուլդանի` Սիւլէյման խանին,

Հանչէրլի սուլդան` յայնժամ կոչէին,

այլ Սուլդանիէ` արդիք կոչեցին,

զոր Գիգլամինոս` յոյնք անուանէին:

539

Դաշտ լայն ծառախիտ` առ ծովեզերին,

՚ի ծոց լայնանիստ` հանդէպ հիւսիսին,

աղբիւր աւազան` կանգնեալ ՚ի նըմին,

պարտէզք բարելիցք` ՚ի շրջակային:

540

Մեծ էր ծոց սորա` այլ ծանծաղ ճախին,

փոքրիկ կղզեակ ինչ` անդ յիւրում ծոցին,

սուլդան Սիւլէյման` հըզօրն առաջին,

ելից եւ փոխեաց` ՚ի դաշտ ցամաքին:

541

Շինեաց հովանոց` ըզբօսարանին,

պարտէզզ վայելուչ` ՚ի դաշտավայրին,

ուր ծառ անուշակ` բերովք սխրալին,

հոսէր իւղ զուարթ` քաղցր օծանելին:

542

Այլ արդ միացեալ` գտցես զերկոսին,

ըզմիմեամբք գրկեալ` նոճին թըզենին,

մինըն պատուանդան` իսկ միւս սիւն նորին,

՚ի հաճոյս աչաց` օտարականին:

543

Բժիշկ է ճարտար` ընտիր ջուր սորին,

երագ բուժելով` քան ըզդեղ նորին,

բղխեալ ՚ի վերայ` ուղղաբերձ լերին,

ընդ խորոփիս ինչ` հին ձեռագործին: