Հայերէն Յիշատակարաններ

***

ԱՒԵՏԱՐԱՆ

Սանջեան, Ցուցակ Ամերիկայի, էջ 233-234, Յովսէփեան, Յիշատակարանք, էջ 919-928

Ստացողք` Գրիգոր եւ Վարդան

Վայր` Գանձասար

ա

<311a> Բխումն շահավետ շնորհի շարադրի եւ շարժեալ ի հայրաշարժ ծագմանն…

<313a> Եւ արդ ամսպառ կտակս եւ զգանձս անկողպտելի, զանճառ երկինս, որ բարձեալ ունի զՏէրն բոլորից, մեք` Գրիգոր եւ Վարդան հարազատք` տրուպ եւ նուաստ քահանայք, ըստ ձեւ տեսակի կրաւնաւորք գոլով, ստացաք զընդիրս առաւել քան զամենայն ինչս պատուականս ձեռաց մարդկան ձգտելոց` զսուրբ Աւետարանս, բազում խերեւեշիւք ըստ կարեաց մերում, յորս եմք տեղեակեալ ի գլուխ սահմանաց Խաչենոյ, ի սուրբ ուխ[տէն] Գանձասար մենաստանէ, որ [է հանդէ՞պ] դղեկիս Սխսաղան Հ[աւքա]խաղաց, առաջնորդութեամբ սուրբ ուխտիս տեայն Յո[վիանիսի անյաղ]թ վար[դապետի եւ] աստուածարել\\\ղ պսակ եկեղեցոյ քրիստոսի մաղթեմք ի յաւկտելոց ի սմանէ` յիշեսջիք զվերագրեալքս ի Տէր, նաեւ զանուանս զհարազատքս ուշիմս, եւ կարկառք մնամք աղաւթից ձերոց, եւ զծնողս մեր զԳերգ Փառաշ եւ զՇահանդուխտ, եւ զայլ եղբարսս եւ զքորս, եւ զազգաինս մեր, քան զի մեք Գրիգոր եւ Վարդան, որպէս զվտիտ եւ գընզար ամոլք ընգալաք զարաւրս մշակին երկնաւորի աւգնականութեա[մ]բն Քրիստոսի առ ի հերկեալ զաւակս սրտից աստուածայնոցդ եւ սերմանելոյ զընդիր ցորեանս, որ յագելլոցդ էք ի Քրիստոսի շահական պտղոյս: Յիշեսջիք զմեզ եւ զամենայն անձս արարե[ա]լս \\\ ի ձեզ, նաեւ զսրբասնեալ եղբարքս մեր \\\[միաբան]ակիցքս համաւրէն` զծերսս եւ \\\ զորդիացեալսս սուրբ ուխ[տիս]\\\ յիշեալ լիջիք ի Տէր Յիսուսի \\\անարգ նկար\\\տես\\\մաին եւ \\\տադեց \\\ թվին ՈՁԶ (1237):

բ

Ծաղկողք` Իգնատիոսք, Յովսէփ

<8b> Տէր Աստուած ողորմեա մեղաւորիս:

գ

<13a> Յիշեա Տէր Աստուած ԶԻգնատիոս եւ Յովսեփ:

դ

<15a> Տէր Աստուած, ողորմեայ բազմամեղիս, ամէն:

ե

<83b> Քրիստոս Աստուած, ողորմեայ Գրիգորոյ եւ Վարդանայ [Փառա]շին որդեացն` ստացողաց սուրբ Աւետարանիս, ամէն:

զ

<139a> Քրիստոս Աստուած, ողորմեայ երկուց եղբարց քահանայից Գրիգորոյ եւ Վարդանայ, ստացողի սուրբ Աւետարանիս, ամէն:

է

<236b> Երկուք եղբարք պատուականք եւ ընտրեալ քահանայք, որ ըստացան զսուրբ Աւետարանս ի հալալ ընչիցիւրեանց` յիշատակ ինքեանց եւ ծնողաց իւրեանց, Վարդան եւ Գրիգոր` որդիք [Փառ]աշին: Քրիստոս Աստուած ողորմի նոցա յիւրում գալստեանն:

ը

Նկարող՝ Աբաս

<199b> Յիշեա զԱբաս նկարիչ տրուպ երեց:

***

ԱՒԵՏԱՐԱՆ

Երեւան 7700

Գրիչ` Գրիգոր

Վայր` Սիս

ա

<294b> Փառք ամենասուրբ Երրորդութեանն Հաւր եւ որդւոյ եւ Հոգւոյ սրբոյ այժմ եւ միշտ եւ յաւիտեանս, ամէն:

Աստանաւր յանգելեալ աւարտեցաւ տառս աստուածախաւս Աւետարանս կենսաբեր, յորում էր թուականս Հայոց ՈՁԶ (1237), ի հայրապետութեան տեառն Կոստանդեայ եւ ի թագաւորութեան աշխարհիս Կիլիկեցաց բարեպաշտ եւ աստուածասիրին Հեթմո, <295> եւ յիշխանութեան աստուածասէր պարոնին թագաւորահաւրն Կոստանդեա, եղեւ զրաւ սորին ի մայրաքաղաքս Կիլիկեցւոյ Սիս, ընդ հովանեաւ Սրբոյ Աստուածածնին:

Ո՜վ սուրբ եւ աստուածահաճոյ քահանայք եւ սպասաւորք բանին Տեառն, յորժամ աւգտիք ի սմանէ ընթերցմամբ կամ գաղափարաւ կամ տեսանելով, յիշեսջիք ի սուրբ աղաւթս ձեր զբարեպաշտ թագաւորն մեր Հեթում եւ զաստուածասէր պարոնն մեր Կոստանդին, որ ստացաւ զսա ի վայելումն անձին իւրոյ եւ յիշատակ բարի իւր, եւ ծնաւղաց իւրոցն, [եւ] ամենայն ազգացն: Յիշեսջիք ի Տէր եւ զբբարի շառաւեղն զսրբասէր քահանայն զեղբայր թագաւորին զԲարսղն, եւ զպարոն Սմբատ գաւնդաւստապլն, եւ զպարոն Աւշինն, եւ զԼեւոնն, եւ զքերս թագաւորին` զսրբասէրն Հռիփսիմ, եւ զԹեփանաւ, եւ զԿալամառի, որպէսզի տացէ նոցա Տէր Աստուած բազմաժամանակեա աւուրբք յերկարեալ յայսմ աշխարհի առողջ հոգւով եւ մարմնով, եւ յետ աստի փոխադրելոյն յերկնից արքայութեանն արժանաւորեսցին, եւ յիշողքդ յիշեալ լիջիք յԱստուծոյ եւ ի Տեառնէ Յիսուսէ Քրիստոսէ, որ է աւրհնեալ յաւիտեանս, ամէն:

բ

<140b> Գրողի սորա Գրիգորի, մեղապարտ քահանայի, նւաստ եւ ետին գրչի Տէր Յիսուս ողորմեսցի, ամմէն:

Յաւուր ուրբաթու սկսայ սուրբ Աւետարանս եւ յաւուր ուրբաթու կատարեցի, փառք Քրիստոսի:

գ

<294b> Իովաննէսի մեղա[պ]արտ քահանայի եւ սուտանուն գրչի Գրիգորի ողորմեսցի Քրիստոս Աստուած իւրում գալստեանն, ամմէն:

դ

<2a> Այս դեհիս գիրն շատ է, ապա քիչ:

***

ԱՒԵՏԱՐԱՆ

Սանջեան, Ցուցակ Ամերիկայի, էջ 347-348

Գրիչ` Առաքել

ա

<274b> Գրեցաւ սուրբ Աւետարանս ձեռամբ Առաքելի քահանայի, տրուպ եւ անարժան ծառայի Աստուծոյ, ի թուիս ՈՁԶ (1237): Արդ` ով սուրբ եղբարք, որք աւկտիք ի սմանէ, մեղաց թողութիւն շնորհեցէք ինձ եւ ծնաւղաց իմոց, եւ սխալանացս որ ի սմա է` թողութիւն արարէք, զի կարի անվարժ էի, եւ բազում մեղաւք եւ տրտմութեամբ լցեալ ի ծովացեալ աշխարհիս: Եւ որով սրտիւ յիշէք եւ ձեզ ողորմեսցի բարեգութն Աստուած, որ է աւրհնեալ յաւիտեանս, ամէն:

Ի ստոյգ եւ յընդիր աւրինակէ:

բ

<81a> Ո՜վ սուրբ եղբարք, յորժամ զաստուածաշունչ Աւետարանս կարդայք եւ լուսաւորիք, զմեղապարտ եւ զանարժան ծառայս Աստուծոյ զԱռաքել գրիչ յիշեսջիք ի սուրբ յաղաւթս ձեր, եւ Աստուած ձեզ յիշէ` որ է աւրհնեալ յաւիտեանս, ամէն:

գ

<130a> Տէր Աստուած. ողորմեա աշխատողի Առաքելի` սուրբ Աւետարանիս:

դ

<213> Զմեղապարտ եւ զանարժան ծառայս Աստուծոյ` զԱռաքել գրիչ սուրբ Աւետարանիս յիշեսջիք ի Քրիստոս, ո՜վ սուրբ եղբարք, աղաչեմ: Եւ որ յիշէք` յիշեսցէ եւ զձեզ բարեգութն Աստուած, որ է աւրհնեալ յաւիտեանս, ամէն:

ե

<292> Ո՜վ սուրբ առաքեալք, յորժամ նստջիք երկոտասան աթոռ` բարեխաւսեցէք առ Տէր վասն գրողի սորա եւ ստացողի Ստեփանոսի եւ ծնողաց մերոց, ամէն:

***

ԱՒԵՏԱՐԱՆ

Լալայեան, Ցուցակ Վասպուրականի, էջ 85-86

Վայր` Բոլորաձոր

Փառք ամենակարող եւ անբաժանելի Սուրբ Երրորդութեան, որ հասոյց զմեր տկարութիւնս ի յաւարտումն եւ ի վերջին գիծս սուրբ Աւետարանիս:

Արդ, գրեցաւ սա ի թվականիս Հա[յ]ոց ԶՃՁԶ (1237), ի Ձորիս Վայո, ի յանապատիս, որ կոչի Բոլորաձոր \\\