Թղթեր

Ահաւադիկ եկն եհաս Սաբուռ Վռամեանն, որ մինչ յատրուշանսն սիգայր պերճն այն արփիանուէր, առաւել չքնաղ եւ սխրալի տեսողացն փայլէր քան այժմ, որ Յունաց հասեալ բախտի պետութեան: Եւ այսպիսում առն հնազանդեալ ծառայել քեզ յոյժ հրաշալի եւ ի վեր քան զզարմանս թուեսցի, որ զայսն խոկան: Քանզի յիրաւի ուրեմն ծայրագոյն ձկնորսացն պարծի զամենայն լերինս քակտել եւ զհպարտացեալսն հնազանդեցուցանել, որոյ եւ դու աշակերտ եւ զարմ հարազատաբար: Բայց Շապուհդ ըստ պարսկականին, որ վեհագոյնդ էհաս մեզ իմաստասիրել, ըստ իսմայէլականին Սաբուռն յորջյորջի, իսկ ըստ Եբրայեցւոց Սաւուղ. որ եւ քոյին նահանգի Սեւորդեացն ոչ ուղղախօսելով զսա, ասեն Սեւուղ:

Բայց մեզ յայսոսիկ ոչ փոյթ է. միայն եթէ հաճոյ թուեսցի քեզ եւ իբրեւ զքրիստոնեայ եւ զգաւառացի եւ զընտանի հաւատոյ օտարասիրել. զի այդ ծայրագոյն է ամենայն հաւատոցն լրութեան, ուստի Աբրահամ օթեւան եւ մայր ամենայն բարութեանց եւ տարացոյց մեզ եղանի:

Կէտ կարթիւ արտակիտիւ քեզ աւադիկ ի կախ կորզեալ.

Կաշկանդեալ կաշեալ կոփեալ կողկոճահոսն առասանեալ.

Կախեալ ի կոհակաց ականակիտ կիտին հասեալ.

Կեփայեան կիտին կամաւ կարեաց կրից ներհուն եղեալ:

Զվաղնջուց ծանուցեալսդ անծանօթ մեզ վարկանիս գոլ, տարագիր եղեալքս ի մօրէ եւ ի հարազատ եղբարց, խեղկեալ եւ գօսացեալ անդամք, առեալ զգիր ձեր, վերծանեայ: Եւ ոչ սակաւ արտօսր թորացուցեալ սակս այսր, տեսանելով զաղէտ տարակուսանաց, տրամակայեալ թեւակոխեցի մերով մակստացական եւ ներածական վարժմամբ, եւ յոյժ զարհուրեալ ի հիացման եղեալ տարակուսեցայ: Որ եւ յիշելով իմ զաստուածայնոյն Դաւթայ յասելն իւրում: Ընդէ՞ր Տէ'ր կացեր ի հեռաստանէ, անտես արարեր ի նեղութեան ի դէպ ժամանակի, եւ օտար եղեն մեղաւորք ի մօրէ, խաբեցան յարգանտի եւ խօսեցան սուտ:

Աղէ' զմտաւ ա'ծ ի քում խոհականութեանդ, եթէ յորժամ զայսոսիկ խոստովանաբար հաւանիս ասել. եւ այս պարզ Յիսուսի աստուածպետականի տնօրինական մատակարարութիւնն, որ առ մեզ իջումն, զիա՞րդ օտարոտի եւ անհաւանական նախնեացն եղեալ պատճառէք պատճառս: Զոր ոչինչ օգտին մարդիկ, այլ մանաւանդ բազում աղէտք եւ անցք եւ տառապանս հասուցանէք ձեզ. տղայական եւ անիմաստաբար վարժմամբ իբրեւ զիմաստուն գոլ կարծէք զձեզ. եթէ քաղցր իմն լուծ եւ հեզաբար հանդարտութիւն եւ եթէ զայլս տղայական մտածութեամբ վարիլ, ձեզ միայն իմանալ յաղագս եկեղեցւոյ, եթէ մարտս է եւ ժողովս: Եւ ո՞ ոք զայս ոչ իմասցի, բայց եւ զեկեղեցի իբրեւ տեղի եւ պատճառ փրկութեան եւ ամենայն տնօրինական ի մեզ ներգործութեանն գործարան եւ այլն որք այսմ հետեւին, եւ իբրեւ զչարչարանացն յաղագս խաչի, կամ եթէ իբրեւ ոչ հնազանդելն կամ որոյն մտածութեամբ վարիլ. բաւական է այս իբրեւ գրեալ է քո, քաջ գիտեմք եթէ բազմապատիկն զրպարտութիւն է եւ ստութիւն. բայց եւ սակայն խոտորեալ յուղիղ գնացից բազում տարագրութիւն ծնանի:

Տրամախոհ տարադրական տատանական տողեալ տոգեալ.
Տարադատ տանտաղական տիւռենական տարակուսեալ.
Տիրապէս տրամադրութեան տորբանականդ ի քէն տոգեալ.

Բառռական բաղդատական բաղազանեալ բարգաւաճեալ.
Բարառաբար բախոհական ներբուն բայի շարամանեալ.
Բարեհամ բուծող հլու բարշոկ գեղոյ ձեզ ընձեռեալ.
Բեդեկ բազմակ բեղուն բակաղեթիւ քեզ նուիրեալ:

Ներուն նամակ նիտան նորին նաքոր անբուժական.
Նախբուն նուէր նիսեան նմին նետիւ անփտական.
Ներձուն նպաստ նաջան նեռին նարին կիզողական.
Ներլուն նաւթ աննակին նոյեան նմին իւր պահապան: