Տաղեր

ՀԱՄԱՅՆ ԱԶԱՆՑ ԴՈՒ ԳՈՎԵԼԻ

Համայն ազանց դու գովելի,
քաղաքդ Անի պանծացեալ,
Ասպնջական թագաւորաց
եւ զօրաց` արդ մենացեալ
Իբրեւ այրի, լքեալ, թողեալ,
Կոխան ոտից ընկեցեալ:
Բնակիչք քոյ յաշխարհ յօտար հեռացան,
Աւա~ղ, տարագիր, տարագիր, ո~հ:

Սնուցեր դու դայեկաբար
զորդիս քոյ յար գգուանօք,
Առ որ զչարեալ եւ գրգռեալ
նետողաց ազգ մախանօք,
Զօրագումար ժողովեցան
Ի վերայ քո պատնիշօք,
Բնակիչք քոյ յաշխարհ օտար հեռացան,
Աւա~ղ, տարագիր, տարագիր, ո~հ:

Կանգնեալ պատուարս եւ նետակալս
հանդէպ քոյ այնք մարտ եդին,
Զգեղեցիկ եւ զբարձրաբերձ
պարիսպքս իսկ փլուցին,
Զհոյակապ եւ զգմբէթեայ
Կերտուած քոյին ընկեցին,
Բնակիչք քոյ յաշխարհ օտար հեռացան,
Աւա~ղ, տարագիր, տարագիր, ո~հ:

Օտարաձայն գոչիւն զօրաց
խուժադուժ մինչ բարձրաձայն,
Ձայն գուսանաց եւ նուագաց
որդւոց քոց ի սուգ դարձան,
Եւ օրհնութիւնք ժամերգութեանց
յեկեղեցեայց լռեցան,
Բնակիչք քոյ յաշխարհ օտար հեռացան,
Աւա~ղ, տարագիր, տարագիր, ո~հ:

Ղամպարազարդ գահաւորակք
եւ տաճարք քոյ մանկալիցք
Յորս վեհազինք եւ պայազատք
էին ճոխք եւ հացալիցք,
Այժմ անասունք տեղակալեալ
շրջին ի քեզ քաղցալիցք,
Բնակիչք քոյ յաշխարհ օտար հեռացան,
Աւա~ղ, տարագիր, տարագիր, ո~հ: