Տաղեր

Կամաւ Սուրբ Հոգւոյն ոմն գիտնական,
Յովհաննէս անուն շնորհիւ պետական,
Լեալ նա յաշխարհէ մեծ Սեբաստական,
Կանգնեալ հաւատով զվանքն Սուրբ Նշան:

Ունելով ընդ իւր զփայտն փրկչական,
Եկեալ ի յաշխարհս փառօք մեծական,
Ամփոփեալ զմասն խնամօք տեառնական,
Վերակառուցեալ զվանքս Սուրբ Նշան…:

Րամք ժողովոց մեծ եւ փոքրկան,
Անչափ բարութեամբ առ ի քեզ ուխտ գան,
Հոգւով եւ մարմնով ցնծան եւ խնդան,
Ապաւէն ազգիս աթոռ, Սուրբ Նշան…:

Արտաքոյ, ներքոյ պատեալ ամրական,
Սրբատաշ քարիւք ես համարական,
Մեծ կաթուղիկէ, տուն արքայական,
Ճեմեալ ճեմարան, ճարակ, Սուրբ Նշան…:

Ի միջի քում կան հաստատ բնակարան,
Թէ եւ կարգաւորք կամ աշխարհական,
Քեզ սպասաւորեն միշտ ծառայական,
Տիրող, տենչալի տաճար, Սուրբ Նշան:

Կարգաւ բոլորիս բազում օթեւան,
Երթեւեկողաց տեղ ասպնջական,
Դու ի ծոց նոցին բազմեալ գովական,
Հանգիստ հաճելի, հաստատ, Սուրբ Նշան…:

Ֆարտ ես, եւ ոչ կայ քեզ նմանական,
Տեսօք եւ տեղեաւ յոյժ հիացական,
Ամենայն բարեօք լցեալ լիական,
Փառօք փառաւոր, փարթամ, Սուրբ Նշան:

Արծաթ եւ ոսկի անօթ ընտրական,
Բուրվառ եւ կանթեղ, խաչ, Աւետարան,
Շուրջառ եւ վակաս, ուրար եւ բազպան,
Զանազան զարդիւք զեղուն, Սուրբ Նշան…:

Երկու աղբերօք ջուր համեղական,
Աստեալ են մայրօք զքեւ պարառական,
Կաս դու ի միջի պրճով սեփական,
Կաքաւեալ կայթեա, կայան, Սուրբ Նշան:

Ցանկան փափաքին ազինք ամենայն,
Մինչեւ այլազգիք առ ոտս քո գան,
Մըռզա եւ պարոն, համ սուլթան եւ խան,
Հիացեալ հային հիմանդ, Սուրբ Նշան: