Տաղեր

Ի յԱմիր ծառայէ հասցէ քեզ ողջոյն,
Վարպետ Բարսեղ, իմ տուն, քաջ եւ իմաստուն,
Խնդրեմ ի յաստուծոյ յիւր առատ բարուն,
Արժան լինիս նորա ամենայն տեսուն:

Խոջամիր Վանեցիս, դու թագ իմ գլխուն,
Ռեհան եւ մանուշակ, կարմիր վարդն դուն,
Շուշան ծաղկի նմանիս ՚ւ աղբերացարիւն,
Բժշկական խոտոյ հարիւր ալամուն:

Է' իմ սրտի սուն ՚ւ իմ ուրախութիւն,
Ձայնդ է քո գեղեցիկ, որպէս կաքաւուն
Յառաւօտեան ժամին քան զծիծառնուն
Եւ որպէս զբազէ ծանօթ ես որսուն:

Ձայնիւ ահեղ գոչես որպէս զարծւուն,
Եւ ես` թափառական ի մէջ փշերուն,
Զփետուրս իմ երանես, տանիլ տաս քամուն,
Ես գլուխ ի գետին, քո ոտաց հողուն: