Տաղեր

Գեղեցիկ պատկեր,
Կարմիր ես հագեր,
Նուռ ու խնձոր բերեմ դու կեր.
Այլ չեմ դիմանար,
Քու սիրուդ համար,
Բարակ նայելուդ համար:

Ուներդ է կամար,
Ես խեւ ու խումար,
Քու ծօվ ծօվ աչերուդ համար.
Այլ չեմ դիմանար,
Քու սիրուդ համար,
Բարակ նայելուդ համար:

Իմ մահն մի՛ առնուր,
Զքեզ չի թողուր,
Արեւուդ համար ինձ պաքիկ մի տուր.
Այլ չեմ դիմանար,
Քու սիրուդ համար,
Բարակ նայելուդ համար:

Գէմ անօրէն չես,
ԶԱստուած կու պաշտես,
Մէկ ողորմութիւն՚մ արա մեզ.
Այլ չեմ դիմանար,
Քու սիրուդ համար,
Բարակ նայելուդ համար:

Գինով եմ հարբած,
Սիրով զիս խոցած,
Դու ուրախ եւ զիս լացուցած.
Այլ չեմ դիմանար,
Քու սիրուդ համար,
Բարակ նայելուդ համար:

Գիշերն ոչ ի քուն,
Ցորեկն երերուն,
Հա՛յ արիւնահեղ զալըմ.
Այլ չեմ դիմանար,
Քու սիրուդ համար,
Բարակ նայելուդ համար:

Մինաս խօսեցաւ,
Գէմ հանդիպեցաւ,
Իւր եարին ասաց, կանգնեցաւ.
Այլ չեմ դիմանար,
Քու սիրուդ համար,
Բարակ նայելուդ համար:

Միջկունքդ է բարակ,
Աղեղ նմանակ,
Քանի քաշեմ կեռ ու շիտակ.
Այլ չեմ դիմանար,
Քու սիրուդ համար,
Բարակ նայելուդ համար:

Ծծերդ է բամբակ,
Լուսին, արեգակ,
Գիշեր_ցորեկ լոյս տուր աչացս:
Այլ չեմ դիմանար,
Քու սիրուդ համար,
Բարակ նայելուդ համար:

Երեսդ որ նայիմ,
Ես խեւ կու լինիմ,
Այս քու դարդէդ ի՞նչ տի լինիմ.
Այլ չեմ դիմանար,
Քու սիրուդ համար,
Բարակ նայելուդ համար:

Դնչիկդ է փոքրիկ,
Հոտովդ անուշիկ,
Կարմիր գունով դեղձան մազիկ.
Այլ չեմ դիմանար,
Քու սիրուդ համար,
Բարակ նայելուդ համար:

Խատուած կաքաւ ես,
Պօյովդ երկան ես,
Զէտ սալվի ծառի նման ես.
Այլ չեմ դիմանար,
Քու սիրուդ համար,
Բարակ նայելուդ համար:

Մանր կու քայլես,
Զհոգիս կու հանես,
Սիրամարգի նման ճեմես.
Այլ չեմ դիմանար,
Քու սիրուդ համար,
Բարակ նայելուդ համար:

Երեսդ է պայծառ,
Պօյդ է ֆիդան,
Ծառ ծօցիդ միջի անճաղ թակնար.
Այլ չեմ դիմանար,
Քու սիրուդ համար,
Բարակ նայելուդ համար:

Սիահ ուներ ես,
Զմարդիկ կու ճեմես,
Բոլոր անձամբդ գեղեցիկ ես.
Այլ չեմ դիմանար,
Քու սիրուդ համար,
Բարակ նայելուդ համար:

Աչօքդ նայէ,
Դու մեզ ողորմէ,
Այդ լոյս երեսդ կու փայլէ.
Այլ չեմ դիմանար,
Քու սիրուդ համար,
Բարակ նայելուդ համար:

Ակռադ մարգարիտ,
Ճերմակ գեղեցիկ,
Պռկունքդ անուշիկ, զէտ զքեզ շաքրիկ.
Այլ չեմ դիմանար,
Քու սիրուդ համար,
Բարակ նայելուդ համար:

Լեզուդ է արագ,
Պռկունքդ է բարակ,
Հոտով անուշ ես, մանուշակ.
Այլ չեմ դիմանար,
Քու սիրուդ համար,
Բարակ նայելուդ համար: