Գանձեր եւ Տաղեր

ԻԵ. ՔԱՐՈԶ ԵԿԵՂԵՑՒՈՅ, ԳՐԻԳՈՐԻ ՆԱՐԵԿԱՑՒՈՅ ԱՍԱՑԵԱԼ

Գանձ բաղձալի բարութեան մեծի` գտեալ եւ ծածկեալ,

Լրութիւն անթերի, բերող համայնից եւ դու ինքն ի բնաւս,

Զոր ոչ իսկ տանէր երկինն վերին.

Անվայր քո խորան` եթերն անմատոյց,

Անջրպետ ընդ քեզ զարմից հրանիւթից` ցուցար սահմանեալ.

Անքանակ պատկեր գթութեանց խնամոց,

Յաթոռ փառաց թագաւոր բարձանց` ի վեր քան զմիտս.

Ահա ընկալցիս զաղերս աղաւթից` յարմարեալ խնկաւք

Յայս յարկ նուիրեալ, սո՛ւրբ եկեղեցի, աղաչեմք:

 

Րախճան պերճալի` կոչումն ընտանի,

Ձայն ախորժելի, անպարագրելի,

Որ ի թեւս թեթեւս հողմային աւդով

Ամենավստահ կառավարութեամբ բազմեալ տիրապէս,

Արկեր քեզ գահոյս յառակս խորհրդոյ աւետեաց ելիցն լրման.

 

Ածողդ ի յարմար իրին կատարմամբ`

Նկատեալ զվայր քոյին բնակութեանդ,

Յաւէտ անջրպետ, եւ յոգիս մեր միշտ,

Զոմն աթոռ եւ զայլն` պատուանդան,

Տեղի լուսատարր ազանց բոլորից.

Ահա ընկալցիս զաղերս աղաւթից` յարմարեալ խնկաւք

Յայս յարկ նուիրեալ, սո՛ւրբ եկեղեցի, աղաչեմք։

 

Իմաստագործ, անսխալաստեղծ,

Պատշաճակերտ կազմիչ համայնից,

որ յսկզբնաձեռն յառաջակառոյց զայս կերպարան հրաշազարդ իրի

Հաճեցար լինել նախ զբնակն, ապա` զբազմեալն:

Ձգեցեր զերկին եւ անդ` զերկնայինսն,

Հաստատեցեր զԱդին եւ զկնի` զԱդամ,

Զյաւդուած տապանին` եւ ի նմա` զապրեալսն.

Տաղաւար նախնւոյն հիւրընկալութեան Աբրահամու,

Աւծեալ արձան եւ տուն Աստուծոյ.

Սանդուղք մեր ելից եւ հետ քո իջման.

Ահարոնեան վրան պաշտաման.

Կտակ մատենի, դատիչ խաւսողաց բարձր  Գարիզին ընտրութեան:

Մեծին Սողոմոնի տաճար լուսակիր,

Լեառն Տեառն եւ տուն Աստուծոյ,

Ամբարձեալ նշան յազգս հեռաւորս,

Փողով ձայնարկու կոչման աշխարհի,

Ըստ տեսանողացն զանճառ քո խորհուրդ.

Ահա ընկալցիս զաղերս աղաւթից յարմարեալ խնկաւք

Յայս յարկ նուիրեալ սո՛ւրբ եկեղեցի, աղաչեմք։

 

Գեղապաճոյճ   աշտարակ   կանգնեալ,  

Երկաթեղէն  սիւն  անկործանելի եւ պատուար ամուր եդեալ պղնձի,

Ոսկիաձոյլ աշտանակ լուսոյ,

Կղզի պարփակեալ ալեաւք ամրութեան, 

Ըստ երկրորդ տեսութեանն Եզեկիէլի։  

Նոր հրաւիրմամբ եկեալ ի Ծուրայ,

Ի խնդիր իմաստից դիմեալ ի Սաբայ

Յաւտարասերմ ազանց Քանանու,

Յաւժարընթաց ի Բաբելովնէ։

Խոցեալ ոգի սիրով փեսային,

Դուռն հիւսեալ մայրատախտակաւք,

Քարինք բիւրեղք ընդ կարկեհանաց,

Պաղպաջունք արփիանկարք մահարձանաւք արծաթեղէնաւք,

Քաղաք կենդանի շինեալ Աստուծոյ,

Հոգւոյ ազդեցմամբն խաւսեալ Յիսուսի.

Լեառն պարարտ մածեալ սրբութեամբ.

Ահա ընկալցիս զաղերս աղաւթից` յարմարեալ խնկաւք

Յայս յարկ նուիրեալ, սո՛ւրբ եկեղեցի, աղաչեմք։

 

Ուրախ լեր դշխոյ հարսն պանծալի,

Պսակաւոր մեծ զարմանուհի,

Բազմազաւակ կուսութեամբ բերկրեալ,

Որ ի սկզբան անդ գծագրեցար,

Եւ աստ ի նորումս հանդերձեցար` ոսկիափայլ չքնաղ գոյութեամբ,

Յեղանակաւ կոչմանն Հագարու`

Փոխեալ աղախնոյն ի Սինայէ ի Սաղիմ,

Եկեալ ինքնին անդրանիկն Հաւր,

Առնուլ զքեզ կցորդ ընդ լքեցելոյ ազինն Յակոբայ.

Արկեալ քեզ հիմունս պաշտելիս զառաքելոցն գումարութիւնս,

Աստեղանիշ լուսաւորութեամբ պճնեալ,

Բոցաճաճանչ շքով պաճուճեալ:

Յարգանդ մաքուր եւ ի ծնունդս` անախտս,

Երկնեալ անդստին ժառանգս Աստուծոյ.

Որ է աւրինակ առձեռն յուսով ակնկալութեան

Զխաղաղութիւն գտեալ իսկապէս.

Ահա ընկալցիս զաղերս աղաւթից` յարմարեալ խնկաւք

Յայս յարկ նուիրեալ, սո՛ւրբ եկեղեցի, աղաչեմք։

 

Րաբունն լուսոյ, հզաւր թագաւորն, փեսայն երկնաւոր,

Անճառ խորհրդով ի հանդէս խնճոյից պարու

Կարգեաց քեզ կանոնս անփոխելիս.

Բազմամասնեայ աւրինակ կերպից

Ի նոյն տեսութիւն բոլոր էութեան,

Ի կերպարանս բիւրատեսակս առ ի շինուած կաթողիկէի.

Հասակ տոհմից զանազանութեան` ի մի ժողովետղ հնազանդութեան.

Տուն եւ տեղի եւ յարկ ծածկութեան,

Ճարակ տաւթոյ` եւ վէմ աւգնականի, մարմնագոյիցս հոգիաձիր,

ԶԱստուած ընդ մարդկան ընտանեցուցիչ,

Համանունակ ազանց կուտելոց, յոյս քաւութեան պարտաւորելոց,

Նախացուցակ համարձակելոց,

Կատարելոց անձանց խմբարան.

Ահա ընկալցիս զաղերս աղաւթից` յարմարեալ խնկաւք

Յայս յարկ նուիրեալ, սո՛ւրբ եկեղեցի, աղաչեմք։

 

Իմաստութեանն Հաւր բնակութիւն`

Եւթնաստեղեան սեամբք կառուցեալ,

Յորում աւրհնեալն պատարագի ի սպանդ կամաց ճաշակման հացին

Ի գահաւորակ սրբոյ սեղանոյն.

Կենաց մանանայն եւ Գառն երկնաւոր,

Որ բառնայ զմեղս կենդանեաց եւ ննջեցելոց.

Նոյն ինքն ամենայն եւ յամենայնի զենումն` մեծ քան զՀաբելին,

Որ զցրուեալսն տնաւրինէ

Յանբռնադատ եկաւորութիւն, ի գիրկս ստեանց

Սիրոյ քաղցրութեան կոչէ ձեռամբ յամրոցն անմատոյց,

Փախուցելոցն պատսպարան, ի վերնայարկ սրահն հոգեկիր, 

Յորում զաշակերտսն զարմանագրեաց.

Ուր եղիցին կարգեալք զաւրութեամբ գահերիցութիւնք   վերադիտողաց.

 

Ի պատիւ աւուրս քո ուրախացեալք.

Ունողք անկեան անբծացն պարու`

Զհայրապետն մեր զտեր [այս անուն]

Եպիսկոպոսաւք, երիցմամբք եւ սարկաւագաւք,

Զվարդապետս դպրաւք եւ բնաւին իսկ պաշտաւնեիւք եկեղեցականաւք.

Զթագաւորն մեր իւրովք ծննդովք

Եւ որք ընդ նովաւ են զինուորութիւնք  պետութեանց եւ իշխանութեաց

Հարազատ սիրովդ աւրհնեալ յամենից.

Ահա յիշեսցես եւ ողորմեսցիս հոգւոցն հանգուցելոց

Յուսով յարութեան, խնդրեմք։

 

Եւ եւս առաւել

Զյորդորումն սիրոյ եւ զգործս բարեաց պարգեւել մեզ, խնդրեմք։

 

Րոտել վերստին զմերժեալսն առ ի քէն

Միջնորդութեամբ բազմելոյն ի քեզ, խնդրեմք։

 

ՓՈԽ Գտեալ ակն պատուական մարգարտի

Անճառ ներգործութեամբ յաշխարհիս ծովու, սուրբ Աստուածածին,

Դուստր լուսոյ եւ մայր Սիոնի,

Անձեռագործ հիմն հաւատոյ, ճշմարիտ պատկեր,

Որոյ այսր աւրինակի անուամբս աւծեալ կնքեցար.

Հարսնարան միոյդ մարմնացելոյդ առ ի քէն Աստուծոյ,

Բարեխաւս ընդ քեզ ընկալցիս առ ի հաշտութիւն պարտաւորելոցս.

Զշառաւեղն անմահից կենաց զԿարապետն կոչման սրբոց,

Եւ զպսակն մարտիրոսաց, առաքելովք եւ մարգարէիւք,

Եւ որ մերն է Լուսաւորիչ,

Հանդերձ միանձամբք ճգնաւորաւք, որք են ժառանգք Աստուծո`

Ծնեալք յորդէգրութիւն սուրբ աւազանաւն անանջրպետ հոգետոհմութեամբ,

Յորում կրկին հայցեսցես նորոգել զփոքրն`

Ի մեծ լայնութիւն փառաց անպարունակ բացարձակութեամբ.

Զմայրն մաքուր զաւակաւք,

Հանդերձ ուխտիւք պսակելովք յայնմ երկնային առագաստի

Յաւուր ահաւոր երեւման մեծիդ Աստուծոյ։

Եւ այժմ ողորմեաց մեզ, Տէր Աստուած մեր,

Ըստ մեծի ողորմութեան քում։