Հաւաքմունք ի գրոց պատմագրաց յաղագս գիւտի ժամանակաց անցելոց մինչեւ ի ներկայս

Որդիք Յաբեթի, Գամեր, եւ ի նմանէ Գամիրք. եւ Մագովգ, եւ ի նմանէ Կեղտք, եւ Գաղատացիք. եւ Մադա, եւ ի նմանէ Մարք. եւ Յաւան, եւ ի նմանէ Հելլէնք, եւ Յոյնք. եւ Եղիսա, եւ Թոբէլ, եւ ի նմանէ Թետաղք. եւ Մոսոք, եւ ի նմանէ Լիւրիկեցիք. եւ Թիրաս, եւ ի նմանէ Թրակարիք. եւ Քետէիմ, եւ ի նմանէ Մակեդոնացիք: Եւ որդիք Գամերայ, Ասքանազ, եւ ի նմանէ Սարմատք, եւ Րիփօթ, եւ ի նմանէ Սորոմատք. եւ Թորգոմ, եւ ի նմանէ Հայք. եւ որդիք Յաւանայ, Եղիսա, եւ ի նմանէ Սիկիլացիք, եւ Աթենացիք. եւ Թարսիս եւ ի նմանէ Վիրք եւ Տիւրենացիք, եւ Կիտիիս, ուստի Հռոմք, եւ Լատենացիք, եւ Ռոդացիք. եւ ի սոցանէ մեկնեցան կղզիք ազգաց յերկիր իւրեանց, ընդ ամենայն ազգ հնգետասան. եւ ունին սոքա ի Մարաց մինչեւ ի Սպեռիոս, որ ձգի մինչեւ Յովկիանոս, եւ հայի ընդ հիւսիսի. եւ ապա թուէ ազգս ԾԱ. եւ սահմանս նոցա ի Մարաց ընդ կողմն հիւսիսոյ մինչեւ ի Գադիրոն. եւ ձգին ի Պօտամինոս գետոյ` մինչեւ ի Մաստուսիա` որ է Իլիոն:

Արդ վասն զի խոստացաք յերից որդւոցն Նոյի, զիւրաքանչիւրոցն ազգաբանութիւն առանձին կարգագրել մինչեւ ի մարմնանալն Քրիստոսի. իսկ աստուածային գիրն միայն զՍեմայն գրեալ ունի զծննդոցն յայտնաբանութիւն. եւ զՔամայն եւ զՅաբեթին, միայն այսչափ յիշէ, որչափ գրեցաք ի սմա. վասնորոյ սկսցուք յառաջին ամէն Աբրահամու զազգն Սեմայ, զի մինչեւ ցայս վայր գրեցաք վերստին, թէպէտեւ յոյժ սակաւ ի յոլովից. եւ զայլոցն զկնի, ուստի եւ ժողովել մարթասցուք ի ճշմարիտ վիպագրաց, յարտաքնոց եւ ի ներքնոց:

Սկսանելի է ուրանօր եթող ազգաբանութեանն կարգ, տեղի տուեալ` որք ի մէջս եղեն պատմութիւնք: Զի ասացաւ անդ` Թարա լեալ ամաց Հ. ծնանի զԱբրահամ, եւ զՆաքովր, եւ զԱռան. եւ Առան ծնանի զՂովտ: Եւ մեռաւ Առան առաջի հօր իւրոյ Թարայի, ուր ծնաւ յերկրին Քաղդէացւոց: Եւ առին իւրեանց կանայս Աբրահամ եւ Նաքովր. Աբրահամ զՍարա եւ Նաքովր զՄելքա, զդուստր Առանայ. եւ էր Սարա ամուլ եւ ոչ ծնանէր: Եւ առ Թարա զորդիս իւր եւ ել յերկրէն Քաղդէացւոց երթալ յերկիրն Քանանացւոց. եւ եկին մինչեւ ի Խառան եւ բնակեցան անդ. եւ եղեն ամենայն աւուրք Թարայի Մ. ամ, եւ մեռաւ ի Խառան:

Աստ շինեցաւ Երուսաղէմ ի Մելքիսեդեկէ Քանանացոյ քահանայէ մեծէ: Յայսմ ժամանակի թագաւորեալ Շամիրամ կին Նինոսի, շինեաց թլեր, բլուր ի հողոյ կուտեալ ամրոց: Բայց այլք վասն թլերոյդ ասեն թէ ի յաճախել պատկերապաշտութեանն, եհան Աստուած հողմ փոթորիկ յերկիր, որ առեալ զկուռսն թաղեաց ի տեղիս տեղիս, եւ բնակեալ ի նոսա դեւքն կան ի նոսին ի տանջանս ի կուռսն. վասնորոյ եւ կախարդք միշտ զկախարդութիւնսն առ թլօքն առնեն:

Եւ յեօթանասուն եւ հինգ ամի կենացն իւրոց Աբրամ Աստուծոյ յայտնութեանն արժանաւորի, յորում առնու հրաման ելանել յերկրէն իւրմէ. եւ ել ի Խառանէ, եւ բնակեցաւ յերկիրն Քանանացւոց եւ յ՚ՁԶ. ամի կենաց նորա լինի որդի յԱգարայ աղախնոյ Սարայի, եւ անուանեաց Իսմայէլ, ուստի եւ Իսմայելացւոց ազգն, սոքա են Ագարենացիք, որք Սարակինոսք եւ տաճիկք կոչին, եւ ի ՂԹ. ամի կենաց նորա դնէ նմա Աստուած ուխտ թլփատութեան, եւ թլփատի ինքն եւ ամենայն արու անթլփատ ի տան նորա. եւ առնու զԱբրաամ անուն` փոխանակ Աբրամու, եւ զՍառա` փոխանակ Սարայի: Ի նմին ամի երեւի նմա Աստուած հանդերձ հրեշտակօքն ի Մամբրէ, յորում զպարգեւական զաւակն խոստանայ տալ նմա, եւ նախ ի մարգարէիցն Աբրաամու Աստուծոյ բանն յայտնեալ ի մարդկան կերպարանս, զկոչումն հեթանոսաց գուշակէր. զոր ի մեզ եհան ի գլուխ վարդապետական աւետեօքն յամենայն հեթանոսս Աստուծոյ Բանն Աստուած: Արդ լեալ Աբրաամ Ճ. ամեայ` ծնանի զԻսահակ ի Սառայէ կնոջէ իւրմէ. եւ Սառա Ղ. ամեայ էր յորժամ ծնաւ զԻսահակ. եւ եկաց Սառա յետ ծնանելոյն զԻսահակ ամս ԼԷ. եւ մեռանի: Եւ յետ մահուանն Սառայի առաքէ Աբրաամ զընդոծին իւր զԵղիազար Դամասկացի ի Միջագետս, եւ առնու զդուստր Բաթուէլի զՌեբեկայ զքոյր Ղաբանայ Սահակայ որդւոյ իւրում կնութեան. եւ ապա առեալ ինքն զՔետուրա կին, յորմէ ծնաւ որդիս վեց, եւ այսպէս եղեն ծնունդք Աբրաամու յերից կանանցն, նախ ի Հագարայ Եգիպտացւոյ Իսմայէլ, ուստի ազգն Իսմայէլացւոց, եւ ի Սառայէ լինի Սահակ, ուստի ազգն Հրէից եւ ի Քետուրայ լինի ազգն Պարթեւաց. յորոց քաջն Արշակ` նախնի ազգաց Պալհաւկանին եւ Արշակունոյն: Արդ կեցեալ Աբրաամ յետ ծնանելոյն զԻսահակ ամս ՀԵ. ընդ ամենայն ամաց ՃՀԵ. մեռանի: