Տաղեր

Էանց ցուրտ եւ ձմեռն եւ վիշտն աշխարհի,
Զարեգակն եմուտ, ամպրոպ այն երկնի,
Էջ գերազանցիկ լոյսն արթնարար երկրի,
Ահա եղեալ գարուն, եղանակ բարի,
Եղանակ բարի, եղանակ բարի,
Քաղցրանուագ, վայելչագեղ թռչուն գովելի:

Սիրաբորբոք հողմն հարաւոյ հնչեալ,
Լերինք եւ անապատք, դաշտք, հովիտք ծաղկեալ,
Մանուշակ եւ սիւմպիւլն շարազուգ փնջեալ,
Արէկ, ուրախասցուք ընդ քեզ պերճալի.
Ընդ քեզ պերճալի, ընդ քեզ պերճալի,
Քաղցրանուագ, վայելչագեղ թռչուն գովելի:

Ամենայն ծառք եւ տունկք պայծառազգեցան,
Զանազան տեսակօք սաղարթք յայտնեցան,
Առհասարակ ոստուց մանրագուր ցուցան,
Երթիցուք զբոսանս, եկ իմ նազելի.
Եկ իմ նազելի, եկ իմ նազելի,
Քաղցրանուագ, վայելչագեղ թռչուն գովելի:

Իսկոյն եկեալ ի տես պիւլպիւլն վարդին,
Առ ի հրատարակել զսէրն իւր սրտին,
Ձայնակցեալ ընդ միմեանս տուտին ու ղումրին,
Գեղգեղելով երգեն երգ ուրախալի.
Երգ ուրախալի, երգ ուրախալի,
Քաղցրանուագ, վայելչագեղ թռչուն գովելի:

Սուգն ի բաց մերժեցաւ ամենայն էից,
Քաղցրութեամբ ծաւալեալ զարեգակն երկնից,
Ժամանեաց ցնծութիւն յոգուոց ամենից,
Ժամանակ հրճուանաց եղեւ սիրելի.
Եղեւ սիրելի, եղեւ եղեւ սիրելի,
Քաղցրանուագ, վայելչագեղ թռչուն գովելի:

Ինձ տխրելոյս դու ես հրճուանաց առիթ,
Լեր դու ուրախ, որ ես ցնծամ ճշմարիտ,
Խորիսխ է քո շրթունքդ, ակռատ մարգարիտ,
Խօսքդ է շէքէր, լեզուդ նման պիւլպիւլի.
Նման պիւլպիւլի, նման պիւլպիւլի,
Քաղցրանուագ, վայելչագեղ թռչուն գովելի:

Մեծափայլ է զերեսդ նման արեւու,
Դու նման ես վարդի, մազերդ տերեւու,
Տարբերի մեղմագոյն հողմով հարաւոյ,
Ա'յ իմ տիրընկար պատկեր ցանկալի.
Պատկեր ցանկալի, պատկեր ցանկալի,
Քաղցրանուագ, վայելչագեղ թռչուն գովելի:

Եղեգ եւ կինամոն, տաշխ եւ կասեայ,
Եւ վտակ սարսեալ գետոց Եդեմայ,
Բխեալ ի Հերմոնէ եւ ի Սանիրայ,
Յոյժ ծիծաղածաւալ տեսլեամբ բերկրալի.
Տեսլեամբ բերկրալի, տեսլեամբ բերկրալի,
Քաղցրանուագ, վայելչագեղ թռչուն գովելի:

Ուղղեալ եկ, լէր ինձ մերձ, սուգս իմ վերանայ,
Ղարէնֆիլ եւ սիւմպիւլ, դու քեզ միրանայ,
Երանի այնորիկ, ով քեզ տիրանայ,
Սակաւ մի կաց հանդէպս, ա'յ իմ տենչալի.
Ա'յ իմ տենչալի, ա'յ իմ տենչալի,
Քաղցրանուագ, վայելչագեղ թռչուն գովելի:

Նւաղեցաւ հոգիս կարօտով քոյին,
Արէկ, իմ նունիֆէր, ծաղիկ ծովային,
Անձեռնահաս հումամիւրզի օդային,
Փետուրդ վայելուչ, փայլուն սխրալի.
Փայլուն սխրալի, փայլուն սխրալի,
Քաղցրանուագ, վայելչագեղ թռչուն գովելի:

Է էնն անճառելոյ շնորհի քեզ պարգեւ,
Ուրախանամ տրտմեալ Սիմէոնս ի քեւ,
Փայլես մէջ աշխարհի դու որպէս արեւ,
Լիցիս փառաւորեալ ի աչս ամէնի.
Ի աչս ամէնի, ի աչս ամէնի,
Քաղցրանուագ, վայելչագեղ թռչուն գովելի:

Սիրով եղանակողք, ունկ դնողք բանիս,
Ռա, Ճէ, Լիւն, Դայ է թիւ թվականիս,
Երբ յանգեալ եղեւ երգ Սիմէոնիս,
Ի խնդրոյ Յարութիւն վաճառականի.
Վաճառականի, վաճառականի,
Քաղցրանուագ, վայելչագեղ թռչուն գովելի: