Տարեգիրք

Ի թուին Հայոց ՇԺԱ [511=1062] գային զօրագլուխք Պարսից, ի Տուղրիլ սուլտանէն, բազում զօրօք, եւ հասին մինչեւ ի գաւառն Պաղնայ եւ Թլլխմոյ եւ յԱրկնի, եւ արարին անթիւ կոտորած եւ առին աւար բազում։ Եւ անդ քահանայն Աստուծոյ Քրիստափոր, Բ որդւովն, մտին յեկեղեցին եւ զամենայն ժողովուրդն հաղորդեցուցին, եւ ելեալք ընկալան զվախճան սրով, եւ եղեն մարտիրոսք։ Իսկ ամիրայն որ նստէր յԱմիթ. գրեաց առ զօրավարն Պարսից եւ արար ընդ նմա սէր, եւ խնդրեաց վաճառել զգերիսն ի գաւառն իւր, եւ պատուիրեաց յամենայն իշխանութիւն իւր գնել զգերիսն եւ ազատել, զի էր այր ողորմած, եւ ինքն բազումս ազատեաց։ Արդ իբրեւ եհաս այս համբաւ չարեաց առ թագաւորն Տուկիծ, հրամայեաց ժողովել ժողով բազում. եւ կացոյց զօրագլուխ զմեծ իշխանն Ֆռանգապօլ /35ա/ եւ առաքեաց ի գաւառն Թլլխմոյ, առնուլ վրէժ չարեացն յազգէն Պարսից։ Եկն եւ դուքսն Եդեսեայ Դաւատանոսն, եւ խառնեցաւ ի զօրսն թագաւորին. եւ իբրեւ հասին անդ, տեսին զբազմութիւն կոտորածին եւ լացին դառնպէս։ Եւ յարձակեցան ի վերայ Տաճկացն, որոց լուեալ փախեան յաշխարհն Պարսից։ Եւ յայնժամ Դաւատանոսն յարձակեցաւ ի վերայ քաղաքին Ամթայ, եւ լուեալ քաղաքացեացն զգալն Յունաց, առաքեցին Ֆռանգապօլին ԺՌ [10000] դահեկան։ Իսկ յորժամ հասին ի դուռն քաղաքին, ելին ամենայն զօրք այլազգեացն ի պատերազմ, եւ Ֆռանգապօլն տայր զպատերազմ Դաւատանոսին, եւ ինքն ԿՌ [60000] ձիաւորով ի կողմն անցեալ պարապեալ կայր ի պատերազմէն. իսկ գլխաւոր ոմն ի զօրաց այլազգեացն, այր քաջ, մխեալ կոտորէր զզօրս քրիստոնէիցն. զոր տեսեալ Դաւատանոսն փոխեաց զերիվարն, եւ սատակեաց նիզակաւ զայրն հզօր։ Եւ անդ սպանաւ եւ Դաւատանոսն. /35բ/ զոր իմացեալ Ֆռանգապօլն, յարձակեալ կոտորեաց զզօրսն այլազգեաց, եւ դարձաւ յաղթութեամբ։ Իսկ ոմն ի Հայոց Յոհնուկ անուն, ժողովեաց ԵՌ [5000] հետեւակս եւ ի գաւառն Թլլխմոյ հասեալ, խաւար էած քրդաստանաց եւ Տաճկաց։ Եւ դարձեալ գայր ի Սեւերակքն բազում աւարաւ եւ գերութեամբ։ Իսկ գլխաւոր մի Տաճիկ Շահաշդակ հասանէր Յոհնկուն. եւ նա թողեալ զզօրսն փախեաւ, եւ նոցա առեալ զկապուտն իւրեանց դարձան։ Եւ Ֆռանգապօլն երթայր ի Թէոդուպօլիս եւ հանդիպեցաւ նոցա, եւ կոտորեաց զնոսա եւ էառ զաւար նոցա, եւ զխորանաւոր թուրքսն կոտորէր ուր եւ գտանէր, եւ առնոյր զինչս ի նոցանէ։ Իսկ յորժամ լուաւ Տուկիծն զմահ Դաւատանոսին՝ առաքեաց եւ կոչեաց զՖռանգապօլն, եւ քար կապեալ զպարանոցն ընկէց ի ծով, վասն ապիրատ գործոյն զոր արար, զի ի բաց եկաց եւ ոչ օգնեաց Դաւատանոսին եւ սպանաւ։