Պատմութիւն Հայոց

ԳԼՈՒԽ ԾԹ
Յաղագս Կոստանդիանոսի մեծի:

Թագաւորէ Կոստանդիանոս ամս երեսուն եւ չորս, եւ էր կարգի կայսերացն երեսներորդ երորդ: Սա էր կոչեցեալ ի ծնողաց իւրոց Կոստանդիանոս, եւ անուանեցաւ (ի) զօրաց իւրոց` Սեբաստոս: Եւ հաւատացեալ յԱստուած եւ ի Բան նորա յորդին Միածին եւ ի կենդանարար ամենասուրբ Հոգին, եւ տուեալ պատերազմ ընդ անօրէն թագաւորսն` սատակեաց զնոսա զՄաքսիմիանոս եւ զՄաքսենդիս եւ զԼիկիանէս, եւ որ զկնի այսորիկ պատմի մինչեւ տալ պատերազմ ընդթշնամեացն Կոստանդիանոսի: Որեւ ապա հրաման տայ զօրաց իւրոց զնշան խաչին Քրիստոսի դրոշմեալ ի կապերտոցի, որպէսզի ունիցի յաջոյ ձեռին իւրում զխաչն. եւ մտեալ ի Հռոմ` հրամայեաց յամենայն տեղիս նշանաւոր կանգնել զնշան յաղթութեան խաչի նՔրիստոսի` որպէս ուսուցանէ պատմագիրն: Սա հալածեաց զհերձուածողսն` որ ի ժամանակի անդ նորա յարեան`զԱրիոս եւ զայլ համախոհս նորա, զՆաւատիանոս, եւ զԱրսերւոս, եւ զՆոմերիոս: Ի սորա ժամանակս եղեւ ժողովն Նիկիայ մայրաքաղաքին Բիւթանացւոց, եւ նզովեցաւ Արիոս յերեք հարիւր եւ ի տասն եւ ութն (Հայրապետացն): Սա փոխեաց զթագաւորութիւնն ի Հռոմայ ի Բիւզանդիոն, որ այժմ կոչի Կոստանդինուպօլիս: