Պատմութիւն

Բայց Բէլ հպարտացեալ յանճոռնի հասակն վաթսուն կանգուն, հնազանդեցոյց ինքեան զամենայն իշխանսն որպէս աստուծոյ, եւ ապա արձակեաց, բաց ՚ի Հայկայ՝ որ էր որդի Թորգոմայ, որդւոյ Թիրասայ, որդւոյ Գամիրայ, որդւոյ Յաբեթի, որդւոյ Նոյի, որ ոչ պաշտեաց զնա աստուած, այլ եւ շուն կոչեաց զնա. եւ զի եկն ՚ի վերայ նորա ծանր ամբոխիւ, եսպան զնա Հայկն նետիւ հարեալ զսիրտն՝ պղնձեօք տախտակեալ։

Իսկ որդիքն Քամայ ՚ի գնալն յերկիրն կալուածոց իւրեանց, տեսին զՊաղեստինեայ եւ զկողմանսն Յորդանանու զի պարարտ եւ յուռթի էր. բնակեցան անդ ուժովն Բելայ ազգականին իւրեանց եւ զրկեցին զորդիսն Սեմայ, եւ եղեւ պատերազմ սաստիկ։ Այլ եւ որդիքն Յեկտանայ, Սաբա եւ Եւիլա եւ Ուփիր, իմացան զկազմած զինուց, եւ խնդրէին իւրեանց տեղի ընդարձակ, զի աճեցին ՚ի բազմութիւն։ Եւ յերեսաց նոցա գաղթէին մարդիկ յամրոցս ինքնագործս, եւ ապա սկսան շինել բերդս, եւ պատերազմողքն գտին զմեքենայս առման ամրոցացն, մինչ ձանձրացեալ ազգացն յընտիր առնեն նոցա զերկիր զոր եւ կամեսցին. եւ առ Սաբայն զխնկաբեր երկիրն, զոր Սաբա կոչեաց, եւ Ուփիր զաշխարհն ոսկեհանաց, որ է Հնդիկք. եւ Եւիլա՝ զերկիրն պատուական ականց եւ անուամբն իւր կոչեաց Եւիլատ։

Այլ Ռաքաւ հարիւր երեսուն եւ երկու ամաց ծնաւ զՍերուք. Սերուք հարիւր եւ երեսուն ամաց ծնաւ զՆաքովր, եւ շինեաց Սերուք զՍրուճ. Նաքովր ամաց եօթանասուն եւ ինունց ծնաւ զԹարա. Թարա եօթանասուն ամաց ծնաւ զԱբրահամ։ Յայնմ ժամանակի ասեն լեալ զԱմազոնս, որ է կանանց զինուորութիւն. քանզի զկին ոմն ասեն յազգէն Թորգոմայ ժառանգ մնացեալ թագաւորութեանն ազգին, հատեալ զարու զաւակացն, եւ էր քաջասիրտ եւ արի, եւ աւերէր զազգս բազումս, եւ եղեւ գժտութիւն ՚ի զօրացն, եւ կոտորեաց զնոսա, եւ ստացաւ զօրս ՚ի կանանց, եւ նոյնպէս առնէր եդեալ զաթոռ թագաւորութեան իւր յԱլիօն քաղաքի։