Խիկար

ՀԱՄԱՌՕՏԱԳՐՈՒԹԻՒՆՔ

Գլխուս վրայ — Ես քուկին սպասաւորդ չեմ ։

Ո՞ւր տեսնուինք վաղը — Կ ' ուզե՞ս հեռանալ եւ գլուխս չցաւցնել ։

Կբողոքեմ — Ա՛հ եթէ կարողանայի չարիք մ ' ընել քեզ ։

Սուրճ մը կ'առնէ՞ք — Գործ ունիմ, բաներնիդ գացէք ։

Չէք երեւար կոր — Պարտքդ ե՞րբ պիտի վճարես, աղա ։

Կխոստանամ — Բան մ ' ալ չեմ կրնար ընել ։

Կրնանք քիչ մը տեսնուիլ — Կրնա՞ք ինձի չորս հարիւր ոսկի տալ ։

Ի՞նչ է մեր հաշիւը — Այս օրերս չեմ կրնար քեզի ստակ տալ, քիչ մ ' ալ համբերէ ։

Աղան դուրս չելներ կոր — Հիւր ընդունելու ժամանակ չունինք ։

ՀՈԿՏԵՄԲԵՐ

1 ֊ 8 Հոկտեմբեր

Երբեմն պարզ, երբեմն խառն, երբեմն անձրեւ, երբեմն փոթորիկ ։

Հարսանեաց շաբաթ. կարգուող չկայ ։

Լրագիր մը մեծատուն մը կշողոքորթէ ։

Ընդհանուր հազ. անոնք որ գիւղ գնացած էին՝ կդառնան ձմեռնային բնակութիւնը. օդափոխութիւնը շատերուն մազերը ճերմկցուցած է. օդափոխութենէ սնանկացողներ ալ պակաս չեն ։

9 ֊ 16 Հոկտեմբեր

Խառնակ օդ ։

Երկրագործը շատ գոհ չերեւիր ։

Աշնան նորաձեւութիւնը շատ տուներու մէջ կռուոյ դռներ կբանայ։ Երեւելի մարդ մը կմեռնի։ Ածխավաճառները կլեցնեն իրենց մթերանոցները։ Աստուած խելք տայ իրենց ։

16 ֊ 23 Հոկտեմբեր

Խառնակ, խառնակ, վերջապէս խառնակ ։

Սրտի հիւանդութիւն ունեցողները կնեղուին. երանի անոնց, որ սիրտ չունին, ազատ են այդ հիւանդութենէ։ Լրագրին մէկը եր ե կուան պաշտածն այսօր կայրէ։ Ջերմուկներու վարժուած կրօնաւոր մը անարժանաբար աթոռի մը վրայ բարձրանալու կպատրաստուի, ազգին սանձերը բռնելու համար. Աստուած ողորմի։ Հարուստ աղջիկ մը հօրը տունէն կփախչի։

23 ֊ 31 Հոկտեմբեր

Հողմ եւ անձրեւ։ Թատրոններու եղանակ, բոլոր օթեակները պարապ են ։

Եօթն շաբաթուց վերջերն ենք, հարսնիք չլսուիր բնաւ. թրաքօման մեծ հարուած տուաւ այս տարի, թէ՛ գեղեցիկ աղջիկներուն եւ թէ տգեղներուն ։

Ամսոյս մէջ ծնող մանչերն փառաւոր ապագայ կխոստանան, աղջիկներն ալ փայլուն անցեալ մը. ըստ այնմ վարուեցէք ։