Գիրք վաստակոց

Ա՛ռ զաղէկ հասած պտուղն, որ 'ի ծառն հասեալ լինի, թէ ուզես սեւ եւ թէ սպիտակ, զմեծամեծսն եւ զբոլորն. եւ լուա պաղ ջրով աղէկ, եւ դիր 'ի շքի չորանայ. եւ ապա դիր 'ի շինած աման չափով. 'ի տասն չափ պտուղն՝ չափ մի աղ. եւ դիր երեսք երեսք մինչ 'ի վեր. եւ կա՛լ զբերանն սեկով, կամ քաղրդով. եւ յամէն օր երեք հետ զամանն զերդ լող 'ի միջգետինն գլորեա, որ շրջի պտուղն 'ի ներք. եւ յամէն շարժել՝ տասն թապալ անցո, տասն օր հետ իրերաց. մինչեւ դեղնի եւ թուլանայ. եւ ապա ԺԱ օրն բաց, եւ տես թէ թուլացեա՞լ է աղէկ եւ թոշմեալ, նա եղաւ. եւ թէ ոչ՝ այլ լողեա, որ աղէկ հասանի: Երբ հասանի՝ հան եւ լուա, որ ելանէ աղծրութիւնն, եւ չորացո 'ի շուքն. եւ երբ չորանայ աղէկ՝ ա՛ռ զանարատ հատերն եւ սրբեա աղէկ, եւ մանր աղ ցանեա 'ի վերայ, եւ հա՛ր ափովդ որ միանայ ընդ ինքն. եւ յամանն լից եւ պահեա, եւ 'ի բան տար: