Գիրք վաստակոց

Թէ 'ի ձմեռն լինի՝ լուա զինքն շող ջրով եւ աղէկ ծածկեա որ չհովանայ, եւ ջեր կալ. եւ քուշնայ ընդ ցորենոյ խառնեա եւ տուր որ ուտէ, եւ եղկ ջուր տուր, եւ հոռոմ ձէթ եւ գինի խառնեա, եւ օ՛ծ զանձն. եւ զփորն լուծեա դեղով, եւ 'ի ջղացն եւ 'ի բազկացն արիւն հան. եւ զծունկսն եւ զոտսն քաջ քացախով լուա պինտ, եւ տես թէ օգտէ: Այլ. լուա շող ջրով, ողջանայ: Բայց թէ տաքութիւնդ 'ի շատ աշխատանաց գայ ձիոյն, ա՛ռ այծուց կաթն փարչ մի եւ հաւու կիթ՝ չորս, եւ հոռոմ ձէթ՝ որ կծու չլինի, եւ նշոյ՝ ափ մի. յիրեար խառնեա, եւ անմեռուկի ջուր՝ ըստ չափու կաթին, եւ ընդ բերանն 'ի վայր ա՛ծ երեք օր. օգտէ: Եւ թէ տաքութեանդ իջուածք այլ հանդիպի, որ իջանէ 'ի փողքն, եւ 'ի տաքութենէ լինի, ա՛ռ դաղձի ջուր եւ մանր աղ, եւ հոռոմ ձէթ, եւ օ՛ծ զխամծէքն եւ զփողքն, եւ շող ջրով զոլոքսն ծփեա աղէկ. եւ ա՛ռ շնխաղող եւ անոյշ գինեմրուր, եւ զլեզուաթոռքն շփեա, եւ զթուշքն. եւ թէ ընդ բերանն 'ի վայր երթայ՝ աղէկ է: Եւ թէ ընդ քիթն արիւն գայ, կանաչ գնձի ջուր արկ ընդ քիթն 'ի վայր: