Գիրք վաստակոց

Պարտ է բանհոգաց երկրին եւ գաւառացն իմանալ եւ ճանաչել, եթէ ո՞րպէս է եղանակն յամառան եւ յաշնան, եւ 'ի ձմռան եւ 'ի գարնան. եւ ըստ եղանակացն սահմանել զբնակիչսն եւ զվաստակս նոցա եւ օգտեցուցանել: Եւ ոմանք յառաջնոցն ասացին, եւս առաւել Պորմոնիոս հոռոմն, թէ 'ի գարնան յառաջքն հարաւային հողմն առաւել շնչէ. եւ սկիզբն հողմոյն է 'ի փետրվար ամսոյ եօթն աւուրն 'ի վեր. եւ լինի արեգակն դեռ 'ի Ջրհոսն. եւ վերջքն գարնան է 'ի մայիս ամսոյ եօթն աւուրն, եւ սկսանի ամառն. եւ յայս ամսոյս ութ օրն լինի արեգակն 'ի Ցուլն: Եւ լինի վերջք ամռանն 'ի սեպտեմբեր ամսոյ տասն օրն. եւ 'ի մետասան աւուրն սկսանի աշունն, եւ արեգակն 'ի Կշիռն: Եւ հատումն աշնան 'ի դեկտեմբերի տասն օրն. եւ լինի արեգակն յԱյծեղջիւրն. եւ վերջք ձմռանն 'ի մարտի ամսոյ ինն: Եւ հաւասարութիւն գիշերոյն եւ ցերեկին լինի երկու անգամ 'ի տարւոջն, մին գարնանային 'ի մարտի տասն, եւ միւսն աշնանային 'ի սեպտեմբերի մետասան: Եւ երեւի աստղն որ կոչի արապերէն Թուրայա՝ 'ի յունիսի տասն օրն, եւ սկսանի անհետ լինել 'ի նոյեմբերի երեք օրն. եւ տօն որ յեբրայեցի բարբառն Փուրիմ անուանի՝ լինի 'ի քսան եւ մի փետրվարի: