Գիրք վաստակոց

Զոր հինքն բուռն հարեալ ասացին վասն հնձոցն, զոր 'ի յելն Բազմաստեղացն առնեն. նոյնպէս եւ զաստղն որ կթելոյն է՝ պարտ է աղէկ իմանալ եւ յայնժամ կթել. եւ լինի 'ի փուլն, եւ ոչ 'ի նորն՝ որ վնասի: Եւ տես, որ լուսինն 'ի Խեցգետինն լինի, կամ յԱռիւծն, կամ 'ի Կշիռն, կամ 'ի Կարիճն կամ յԱյծեղջիւր, եւ կամ 'ի Ջրհոսն: Եւ աստ պարտ է իմանալ, որ իմաստունքն եւ գիտնականքն զբան իւրեանց այսպէս առնեն, եւ օգտին 'ի վաստակոցն. եւ անգէտքն իբրեւ զկոյր յընթացս ճանապարհաց՝ խարխափին անօգուտ. եւ վասն այնորիկ արժան է լաւագոյն հմտանալ գործոյս: Արդ արժան է զխաղողն աղէկ ընտրել 'ի խակէն եւ 'ի չորէն՝ 'ի հնձան լնուլն, եւ երեք օրն անշարժ թողուլ. եւ ապա 'ի չորրոդ օրին կոխել. եւ կոխօղքն սպրկիկ պիտին յամենայն ախտից, 'ի գոդութենէ, 'ի պիսակոտութենէ, 'ի բորոյ եւ յամենայն խոցոյ եւ յաղտեղութեանց. եւ լուացած ազգի ազգի մաքրութեամբ մտանէ 'ի հնձանն եւ առնէ զկոխն. զի չէ արժան զմեղսաքաւիչ եւ զամենապէտ ըմպելին՝ աղտեղաբար եւ տաղտկալի գարշութեամբ առնել. եւ թէ ոք առնէ՝ ըստ Առաքելոյն բանի դատաստան անձին իւրում առնէ: Պարտ է հալաւով մտանել, որ քիրտն 'ի լաթն արգելանի եւ չկաթէ 'ի խաղողն: Եւ կին մարդ բնաւ ոչ է պարտ մերձենալ 'ի կոխն, այլ յետ կալ 'ի հնձանէն: