Գիրք վաստակոց

Արժան է զգինին 'ի նոր ժամն եւ 'ի հինն՝ ստէպ համտեսել. եւ վասն այնորիկ պարտ է զնոր գինին յետ ունենալ 'ի հնոյն: Եւ են ոմանք որ երբ բօրէասն ելանէ՝ յայն ժամն բանան զկարասն եւ համտեսեն, զի յայնժամն յիստակ լինի գինին. եւ այլք 'ի հարաւն բանան, որ այնու զգինւոյն այպն իմանան: Զի պարխրցին՝ որ է բօրէասն՝ բնութեամբ յիստակացուցանէ զգինին. եւ հարաւն պղտորէ, նա 'ի պղտորն ամէն այպն երեւի, որ ճանաչես: Եւ պարտ է որ զգինին յորժամ համտեսել կամենան, նա ոչ աղի կերած լինին եւ ոչ կծու. զի այդոքիկ ծածկեն զայպն գինւոյն: Եւ թէ ոք առնու նոր փարչ մի եւ մխէ 'ի գինին, եւ թողու որ կաւն աղէկ խմէ զգինին, եւ ապա 'ի կաւն հոտոտայ. նոյնպէս եւ 'ի փարչէն համտեսեա զգինւոյն ամէն որպիսութիւն եւ անտի ճանաչեա: Վասն այնորիկ խաբեբայ մարդիկ որ կամենան զվատ գինին որպէս աղէկ վաճառել, նա ընկոյզ եւ աղի պանիր եւ կծուահամ կերակուրք շալակեն 'ի հետ իւրեանց, եւ գնողացն յառաջ ուտել տան եւ ապա համտեսել. եւ նա զգինին որպէս անոյշ եւ աղէկ բերէ համտես առնողացն :