Գիրք վաստակոց

Կնդեա զծառն 'ի ճղոցն, եւ արա փոս ուր կամիս զինքն տնկել՝ տակռչին չաքօքն, 'ի խորութիւն այն չափովն՝ որպէս յիւր տեղին լինի կացեալ. եւ նշանեա զարեւելեա կոյսն, որպէս գրեալ եմք, եւ ապա հա՛ն ողջ մազմզկովն: Եւ երբ հանես՝ ջուր սար կա՛լ, եւ ցանելով թա՛ց զտակռիչսն, եւ տա՛ր այն կերպիւ տնկեա ղորդ 'ի փոսն, եւ ղորդեա զարեւելեան կոյսն յարեւելս. եւ զարեւմտեանն յարեւմուտս, եւ զհարաւայինն եւ զհիւսիսայինն, որպէս յիւր տեղւոջն սնեալ է. եւ աղէկ աղբախառն հողով ծածկեա եւ ջրեա եւ ծառայեա, որպէս արժան է: Եւ այսպէս ջրեա. ա՛ռ երկայն փողրակ կամ երկայն ճառայ, այնպէս որ տակուցն հաւասար լինի խորութիւնն. եւ զմէկն 'ի մէկ դիհն թաղեա, եւ զմիւսն 'ի մէկայլն. եւ ընդ այն 'ի վայր ջրեա, որ ներքսագոյն մազմզկացն ծառայէ ջուրն, եւ չծառայէ երեսաց գետնոյն. եւ ստէպ ընդ այն 'ի վայր լի՛ց զջուրն, եւ ապա զբերանն պինտ խծկեա քթեթով, որ առ 'ի վայր չլնանի: Եւ թէ այն որ ջրելն երաշտ լինի եւ երեսքն, զտակսն եւս ջրեա, եւ սակաւ մի փոս թո՛ղ որ ջուրն հանգչի, մինչեւ գոյանայ ծառն: Եւ այս է սահմանն եւ ղորդ տնկելն մեծ ծառոցդ, 'ի ձմեռնամտէն մինչեւ Յինունքն, որ Բազմաստղն անկանի, 'ի դեկտեմբերի ԺԱ օրն: Եւ այս այսքան: