Գիրք վաստակոց

Զթրնջին յաշնանէն 'ի վեր մինչեւ 'ի գարնանամուտն կարես, երբ քեզ պիտի, տնկել. եւ իւրեանս սնուցիչն եւ գոյացուցիչն պարխրցի հողմն է, եւ այտով կու տիրէ այլ ծառոց. զի այլ ծառքդ զհարաւն սիրեն։ Եւ ոմանք որ կամենան զթրնջանին մեծ առնել, նա դեղն այս է. որ թեթեւացուցանեն զճիւղսն, եւ զաւելի պտուղսն 'ի վայր տան եւ զարքինի թրջանին մէն թողուն, նոյնպէս եւ զաւելի տերեւսն. նա մեծ լինին եւ աղէկ: Եւ զդեղձին եւս այսպէս պարտ է առնել: Եւ զթրնջին չէ պարտ տնկել, եթէ ոչ մօտ 'ի պատ եւ 'ի պարիսպ. եւ 'ի ձմեռն ծածկել պարտ է այս օրինակաւս. Հա՛ն զդդմոցն տակօքն, եւ 'ի թրնջի ծառն փաթաթեա նոյն տերեւօքն, նա պահէ զինքն 'ի ցրտոյն. նոյնպէս եւ զլիմոնին. եւ թէ խսիրով պատես՝ լինի. բայց դդմենին ստոյգ պահէ 'ի ցրտոյն զծառն: Եւ թէ այրէ ոք զդդմենւոյն փայտն, եւ զտակն եւ զմոխիրն 'ի տակն լնու, եղեման վնաս չտայ առնել, եւ յամենայն կողմանց օգտէ ծառին եւ հաստացուցանէ եւ թորթոշեցուցանէ զինքն: Եւ թրնջիդ չընդունի զօտար պատրոյս քան թուրինջ միայն. եւ իւր պատրուսելն զերդ այգւոյ է: Եւ թէ ուզես որ թուրինջն ամբողջ մնայ 'ի ծառն, բռով շաղախ արա եւ զթուրինջին բոլորն պատէ, եւ թող որ չորանայ 'ի վերայն. ամբողջ մնայ որքան կամիս: