Տաղեր

Այբէն մինչեւ ի քէն,
Այբէն մինչեւ ի քէն,
Գովեմ քանի յիմ լեզւէս
Միտքս կու բաւէ,
Միտքս կու բաւէ:

Բերիր դու ինձ հանց կրակ,
Բերիր դու ինձ հանց կրակ,
Որ ի յիմ սիրտս անկէր,
Անկեալ կու այրէ,
Անկեալ կու այրէ:

Գուն քո գեղեցիկ,
Գուն քո գեղեցիկ,
Այդ քո գերագոյն գունովդ
Զգունս իմ քաղեր է,
Զգունս իմ քաղեր է:

Դու ես յայն վարդէն,
Դու ես յայն վարդէն,
Նմա որ յիւրմէն ելեալ
Հոտն կու բուրէ,
Հոտն կու բուրէ:

Ես ո՞ւմ գանկտիմ,
Ես ո՞ւմ գանկտիմ,
Երբ իմ խոցերուս դեղն եւ ճարն,
Մհլամն ի քէնէ,
Մհլամն ի քէնէ:

Զերեսդ ի լուսին
Զերեսդ ի լուսին,
Երբ նմա ցուցիր, յորժամ
Թամամ բոլորէ,
Թամամ բոլորէ:

Էդ ծով-ծով աչերդ,
Էդ ծով-ծով աչերդ,
Ալիդ զիս ի ներս քաշէր
Ու ղարղ արեր է,
Ու ղարղ արեր է:

Ըստ իմ չար գործոցս,
Ըստ իմ չար գործոցս,
Զինչ որ վերայ ինձ կու գայ,
Դեռ կէս ճազան չէ,
Դեռ կէս ճազան չէ:

Թող երթան ասեն,
Թող երթան ասեն,
Տօստում, կու սիրեմ զքեզ,
Թող երթան հաջեն,
Թող երթան հաջեն:

Ժամ է, ամ հերիք արա,
Ժամ է, ամ հերիք արա,
Որ յետոյ զքեզ ինձ համար
Աստուած ստեղծեր է,
Աստուած ստեղծեր է:

Ինձ թէ չես հաւան,
Ինձ թէ չես հաւան,
Ակ ճոհար, վարդեր ունիմ,
Սիրտս բոլորէ,
Սիրտս բոլորէ:

Լուսինն ՚ւ արեգակն,
Լուսինն ՚ւ արեգակն,
Երբ որ տեսանէ զքեզ,
Ի մայր մտանէ,
Ի մայր մտանէ:

Խօսիկ մի քանի,
Խօսիկ մի քանի,
Մեզ պատգամ տուր` կասեմ,
Ի խոր դու լսէ,
Ի խոր դու լսէ:

Ծօցդ է քո ծաղկոց,
Ծօցդ է քո ծաղկոց,
Յաչերուս առու քաշեմ,
Տնկիկ մի ջրէ,
Տնկիկ մի ջրէ:

Կամար ուներովդ,
Կամար ուներովդ,
Քան զչարխի դեղած նետերով
Սիրտս խոցեր է,
Սիրտս խոցեր է:

Հուր ինձ վառեցիր,
Հուր ինձ վառեցիր,
Հանց կրակ դրիր յիմ սիրտս,
Որ անցնելու չէ,
Որ անցնելու չէ:

Ձուն ինձ ծնկախառն,
Ձուն ինձ ծնկախառն,
Մէջ վարդավառիս եկեր,
Դեռ վերանալու չէ,
Դեռ վերանալու չէ:

Ղամ դու մի՛ աներ,
Ղամ դու մի՛ աներ,
Զիս նայել ի բաց թողեր,
Զայլ ոք սիրեր է,
Զայլ ոք սիրեր է:

Ճոխս առեալ ճեմեր,
Ճոխս առեալ ճեմեր,
Այդ մորճ ու բարակ միջկունքդ
Ի յուռն նմանէ,
Ի յուռն նմանէ:

Մտիկ եմ արեր,
Մտիկ եմ երեր,
Ոտիցդ ու մատանցդ ի վեր
Յաղեղ նմանէ,
Յաղեղ նմանէ:

Յազգէն Եւայէ,
Յազգէն Եւայէ,
Քան զքեզ կեօզալ եարիկ
Այլ ո՞վ սիրեր է,
Այլ ո՞վ սիրեր է:

Նոր միրգ է բերած,
Նոր միրգ է բերած,
Քան զգինն թանկ կասեն,
Չեշնին հալալ է,
Չեշնին հալալ է:

Շողս առեալ շրթանց,
Շողս առեալ շրթանց,
Յայդ նուշ շէքէր բերնէդ,
Խօսիկ մի ծախէ,
Խօսիկ մի ծախէ:

Ով որ բամպասէ,
Ով որ բամպասէ,
Լսողն խելօք պիտի,
Շունն երթայ հաջէ,
Շունն երթայ հաջէ:

Չարկամ դու ունիս,
Չարկամ դու ունիս,
Յերբ որ դու ի յիս կու գաս
Ջանա սպանանէ,
Ջանա սպանանէ:

Պորտիդ բոլորէն,
Պորտիդ բոլորէն,
Սիրտս մանուշակ կուզէ,
Արէկ դու քաղէ,
Արէկ դու քաղէ:

Ջանա ու փնջէ,
Ջանա ու փնջէ,
Վարդ ու մանուշակ ՚ւ ռահան`
Քեզ ո՞վ կու խնայէ,
Քեզ ո՞վ կու խնայէ:
Ռէզէ ու կպղէ,
Ռէզէ ու կպղէ,
Զքո սէրդ յիմ սրտիս միջին
Յիրուր բեւեռէ,
Յիրուր բեւեռէ:

Սէր ունիմ հետ քեզ,
Սէր ունիմ հետ քեզ,
Յորժամ տեսանեմ զքեզ,
Սիրտս ո՛չ համբերէ,
Սիրտս ո՛չ համբերէ:

Վարդ ես դու հոտով,
Վարդ ես դու հոտով,
Ով քեզ ի ձեռն առնու`
Հոտդ կու բուրէ,
Հոտդ կու բուրէ:

Տաղաւար ես դուն,
Տաղաւար ես դուն,
Ով որ գայ ի քեզ նստի,
Մէճլիս կու առնէ,
Մէճլիս կու առնէ:

Րահացեալ բարի,
Րահացեալ բարի,
Սատաֆ ու մարգարտէ շար ես
Բոլոր պատկերիդ,
Բոլոր պատկերիդ:

Ցնծացէք այսօր,
Ցնծացէք այսօր,
Մանկտիք, որ ի մեր մէճլիս
Նոր վարդ եկեր է,
Նոր վարդ եկեր է:

Ւիւր ես դու վառած,
Ւիւր ես դու վառած,
Կրակ ես ձգեր յիմ սիրտս,
Զիս այլ կու այրէ,
Զիս այլ կու այրէ:

Փայլուն է պատկերդ,
Փայլուն է պատկերդ,
Ով որ գա ի քեզ հայի,
Զգունն կու քաղէ,
Զգունն կու քաղէ:

Քաղցրիկ բառ ունիս,
Քաղցրիկ բառ ունիս,
Երբ որ դու անուշ խօսիս`
Պլպուլ կու նմանէ,
Պլպուլ կու նմանէ: