Տաղեր

Մեղաւորիս յիշատակ
Զայս գրեցի Հալապ քաղաք,
Խիստ ցանկացայ պատմագրիս`
Ուրախութեամբ կատարեցաք:

Ի օգնութեամբն աստուծոյ
Փափագանօք յետեւեցաք
Եւ կատարեաց խնդրվածս,
Որպէս որ մեք Տեառնէ հայցաք:

Այլեւ ի ջերմեռանդ սրտով
Տիւ եւ գիշեր աշխատեցաք,
Լցեալ էի զազիր գործով,
Փոքրիկ հոգոյ աչքն բացաք:

Որք հանդիպիք ծաղկագրիս,
Չար մեղաւորս յանժամ յիշաք,
Տէրն յիշէ զձեզ այն ձայնիւն,
Վերայ խաչին ընդ աւազակն:

Քրիստոս ո'չ յիշէ ձեր մեղքն,
Աւուր դատաստանին խնդաք,
Ձեզ պարգեւէ արքայութիւն
Եւ տացէ լուսեղէն պսակ:

Եւ թէ զիմ մեղս ամէն գրեմ,
Չկայ յաշխարհս այնչափ թխթանք,
Գլորել է խելք ու միտքս,
Ծովացեալ մեղքս որպէս ողբանք:

Ես մեղաւոր Աւետիքս,
Կամաւ շատ չարիք գործեցաք,
Խոստովանայ քահանայի`
Բազում մեղքն մեզնէ բարձաք:

Վասն այն, որ ես վայ տամ գրչիս,
Յետու այն գործն գործեցաք,
Կամաւ կազմեցի ճանապարհ
Առ դժոխքն լայն եւ արձակ:

Սուրբ կուսն բարեխօս դրէք,
Հանդիպողք յորժամ զայս կարդաք,
Որ զմեզ արժանի առնէ,
Առ սուրբքն աստուծոյ խայտանք:

Զձեզ ողորմեսցէ տէր աստուած,
Լի սրտով մեղաւորս յիշաք,
Զձեզ ազատէ գեհենոյն,
Լսէ ձեզ յորժամ աղաչաք:

Ի յաւուր ատենին սարսիմ`
Սրբութեամբ ոչ առի բաժակ
Գործեցի զչարն անխնա,
Բարի գործոցն կամաւ զատանք:

Տարակուսեալ եմ եւ տխուր,
Այսմ աշխարհէս որպէս երթանք,
Շիվար, ապուշ եմ մնացեալ,
Թէ մեղացս որպէս համար տամք:

Լաւ էր չէի ծնեալ մօրէ,
Ի յաշխարհէս ոչ շահեցաք,
Սեւացուցի պայծառ հոգիս,
Չար գործով կամաւ կուրացաք:

Սարսիմ աւուր դատաստանի,
Մեղայ տուաք եւ ոչ դարձաք,
Այլ վասն մեր ագահութեան,
Որի մէջ մեղաց պաղեցաք:

Յորժամ եկեղեցին երթաք
Եւ ողբալոյն ծիծաղէաք,
Կապեալ էի չար թշնամոյն
Կիւր աչօքս ոչ արտասվէաք:

Տէր, մի' յիշեր զիմ չար գործքն,
Կամա ակամա վարեցաք,
Ողորմեա մեզ Քրիստոս աստուած,
Մեք ի մէջ մեղաց այրեցաք:

Բարէխօս Տիրամայր մայրդ ունիմ,
Առ միածինդ ես համարձակ,
Մէջ մեղաց խաւար գբոյ եմ,
Մարդասէր Տէր, հա'ն զիս արձակ:

Բարէխօս առաքեալքն ունիմ,
Որ ի վերնատունն զօրացաք,
Մէջ հրէից, հեթանոսաց.
Քրիստոս աստուած քարոզեցաք:

Բարէխօս մարգարէքդ ունիմ,
Առաջագոյն գուշակեցաք
Եւ ողջախոհ նահապետքն,
Ջրհեղինացն ազատեցաք:

Բարէխօս հայրապետքդ ունիմ,
Ըզկնի այն հաստատեցաք,
Ամօթ արիք Արիոսին,
Չար աղանդն միջոյ բարձաք:

Բարեխօս մարտիրոսքդ ունիմ,
Վասն Յիսուսի վկայեցաք,
Քրիստոս աստուած է ճշմարիտ,
Արեամբ ձերով պսակեցաք:

Եւ սուրբ Յոհանէս Մկրտիչն
Եւ նախավկայ սարգաւակ,
Վասն սիրոյն Քրիստոսի,
Դուք եղաք հառաջ նահատակ:

Բարեխօս սուրբ կուսանքդ ունիմ,
Զինավոր էք Տեառն Հռօփսիմաք,
Զձեզ ամբողջ սուրբ պահելով,
Որ Տրդատայ կատարեցաք:

Եւ բարէխօս մանկունքդ ունիմ,
Առաքեալքն աշակերտեցաք,
Եօթանասուն երկու էիք,
Որ ի յաշխարհս սփռեցաք:

Բարէխօս թարգմանիչքն ունիմ,
Յոլով գիրքս թարգմանեցաք,
Սփռեցիք մէջ Հայոց ազգիս,
Կապեալ շրթունքս մեր բացաք:

Բարէխօս վարդապետք ունիմ,
Իբր զաղբիւր էք յորդառատ,
Օր աւուր բխէ, բազմանայ,
Արբուցանէ զծարաւեալս:

Բարեխօս քահանայքդ ունիմ,
Որ շնորհս Պետրոսէ առաք,
Յերկրէ յերկինս կապեալ գծողս,
Միայն բանիւդ արձակեցաք:

Լալով ասաք, թէ` Տէր մեղայ,
Առաջի ձեր արտասուեցաք,
Տէր թողցէ մեղս ձեր լուաք,
Հոգով մարմնով պայծառացաք:

Թագաւորքդ ունիմ բարեխօս`
Աբգարդ հեռուստ փափագեցաք,
Կոստանդիանոս, Թէոդորոս,
Որ սուրբ հաւատս հաստատեցաք:

Գոհութիւն, փառք ստեղծողին,
Որ նմանէ գոհացաք,
Անարգեցիք կուռքն եւ մեհեանքն,
Արարիչ Յիսուս հաւատացաք:

Ամենայն սուրբք բարէխօսէք,
Առաջի Տեառն էք համարձակ,
Խնդրեցէք գրչիս թողութիւն,
Որ մէջ մեղաց նուաղեցաք:

Հանդիպողք գրչիս ողորմիք,
Ձեզ ամենայնոցդ ոտից կոխանք,
Ծնողացս ողորմեցէք,
Որ լսէ Տէր ձեզ զաղաչանք:

Հայր իմ Բաբաքն յիշեցէք,
Այս է ձեզանէ ողոգանք
Եւ մայրն իմ Ուլուխաթունն
Տէրն դասէ յաջակողմեանն:

Յիշեցէք, ողորմեցեք,
Հաստատհաւատ քրիստոնեաք,
Ողորմեսցէ ձեզ տէր աստուած,
Պարգեւէ լուսեղէն պսակ:

Զեղբայրս իմ Մարգարէն յիշէք,
Տէրն տացէ իւրեան բազում կեանք,
Խաղաղութեամբ կենօք պահէ,
Եւ ոչ ընկանէ չար փորձանք:

Յիշեցէք ծնունդս գրչիս` որդի
Յակոբ, դուստր մի` Խալաֆ,
Նորաբողբոջ Դադամխութլուն`
Սոքա են գրչիս յիշատակ:

Թվական հազար հիսուն եւ երեքին
Ողորմութեան արժանացաք,
Տէրն պարգեւեաց մեզ նոր ծաղիկ`
Որ Ավդլմսէ կոչեցաք: