Տաղեր

Երգ զարմանազան ձայնիւ հրաշազան,
Նւագեմք կուսին յոյժ վայելչական,
Որ է անտեսին մեծ խորհրդարան
Եւ աստուածութեանն տուն եւ մարմնարան:

Րախճան ցանկալի, աթոռ տիրական,
Սուրբ Աստուածածին, կոյս անապական,
Ծածուկ խորհրդոյն յայտնիչ եւ թարգման,
Փառաց անեղին տեղ բնակութեան:

Գովեալ տիրուհի, մայր անմահութեան,
Դրախտ ցանկալի մշտագեղութեան,
Զպտուղն կենաց մեզ ի քէն տըւան,
Ի ծառոյդ երկրէ, որ յերկինս բուսան:

Ի քո սուրբ յարգանդ էջ երկնից արքայն,
Ի ծաղկածին վայր քո մաքուր խորան,
Որ ի սրովբէիցն էր անհասական,
Քեւ հասու եղաք կերպիւ մարմնական:

Բուրվառ խնկալի հոտով զուարճական,
Զմայլումն երկնային մեզ քեւ մատուցան,
Ճաշակ բերկրալի եւ անմահական,
Մեզ ընծայեցեր, ծնօղ տիրական:

Անծանօթ շաւիղ անբաղդատական,
Կոյս անհամեմատ ի որդոց մարդկան,
Դու ճշմարտութիւն յերկրէ բուսական
Եւ արդարութիւնդ մեզ յերկնէ ցուցան:

Րակերտող էին լուսափայլութեան,
Անշէջ կայծականն եղեր վառարան,
Արփին վեհագոյն, ծագումն անսահման,
Քեւ մեզ ծագեցաւ լոյսն անճառական:

Սիրոյ աղբերէն, որ միշտ եւ կենդան,
Արբեր հոսանօք անսպառական,
Աղբիւր պարտիզաց ծաղկոցաց արբման,
Արբեալ զովացո զմեզ ի փափագման:

Երանուհի մայր, պարծանք կուսութեան,
Մարիամ, տաճար Տեառն Յիսուսական,
Գեղմն իմանալի անձրեւոյն հեղման,
Ցօղեա ի հոգիս, որք ի քեզ յուսան:

Ղամբար երկնաէջ անաղօտական,
Վառեալ տէրութեամբն յերրորդական,
Սիւն քո ծառայի, լեր յար պահապան
Եւ ընդդէմ չարին միշտ ամուր վահան:

Էդ աստուծոյ Հօր, Որդի միական
Եւ միածին մօրդ` կուսի սրբազան,
Զմաղթանս մեր ընկալ ի քոյդ հաճութեան
Եւ արժանացո զմեզ ողորմութեան: