Գիրք վաստակոց

Ա՛ռ զերկայն պտուղն՝ նոյն կոթերովն, ընտրած եւ աղէկ հասած եւ սեւ անարատ, եւ լուա հով ջրով եւ դիր որ չորանայ 'ի վերայ խասրնուն. եւ դիր 'ի տաշտն, եւ լից 'ի վերայ անոյշ պտղի ձէթ, եւ մանր աղ չափով. եւ մնշեա սերտ ձեռօքդ այնպէս որ չպտխի կամ գանի. եւ ապա զչամանն, եւ 'ի վերայ զքացախն մեղրախառնած եւ սիրքէնճիւպին շինած. այնպէս՝ որ ծածկէ զամէն պտուղն աւելեօք, զի թերենայ. եւ ապա ըռազիանի ցախով կա՛լ զբերանն, եւ տախտակեա եւ ծեփեա. եւ յետ տասն աւուրն կեր: Եւ թէ ուզես այլազգ, մուստառով դնես պտուղ. ա՛ռ զսպիտակ ազգ պտուղն զընտիրն եւ զանարատն. եւ ա՛րկ 'ի ծովուն ջուրն 'ի թուրջ՝ վեց օր, եւ ապա դիր 'ի շինած աման, եւ ա՛ծ մուստառ 'ի վերայ. եւ մի՛ շատ լնուր, որ չեռայ եւ 'ի դուրս ձգէ. եւ զբերանն ծեփեա մենակ եւ պահեա: Եւ են ոմանք որ ափ մի աղ ածեն, եւ ապա զմուստառն, եւ թողուն որ դադարէ եռն, եւ ապա ծեփեն զբերանն: