Գիրք վաստակոց

Արժան է զորձսն երկու ամսով յառաջ զատեալ յայլ գեհէն, եւ աղէկ ածել 'ի խոտաւէտ սահման, որ ուժաւորին եւ գիրանան, եւ ապա թողուն: Եւ իւր ղորդ աւուրքն վազելոյն՝ երբ որձն երկու տարեկան լինի, մինչեւ ութն, եւ անտից 'ի վեր դահ է, չէ 'ի բան: Եւ մաքիքն բնութեամբ զդահ էգն սիրեն, եւ աղէկ է. թողուլ պարտ է: Եւ թէ ուզենաս որ յամէն տարի մատղաշ գառն եւ կիթ ունենաս, դու զորձուն թողուլն յայլեւայլ ժամս տարւոյն արա. եւ յարդ ա՛ռ եւ գարի խառնեա 'ի ներք, եւ սոխեր կտրատեա 'ի հետ, եւ տուր որ ուտեն. նա խիստ շարժէ զիւրեանք: Եւ թէ զխոտն՝ զոր հովուի բիր կոչեն՝ խառնես եւ տաս, շատ աքաղ տայ առնել որձացն եւ իգացն. եւ քօշին եւ մաքւոյն միապէս է: Եւ թէ կամիս որ ամէն գառինք որձ լինին, 'ի պարզ աւուր որ պարխրցի հողմն շարժի, զմատակին վերջքն 'ի հիւսիս արա, եւ վազեցո, նա որձ լինին. եւ թէ ուզես 'ի հարաւային կողմն արա, նա էգ տայ ծնանել. եւ այլ, ոչ թէ ոչխարաց մէն է փորձով, այլ եւ մարդոյ եւ ամենայն կենդանեաց: Եւ թէ զաջ ձուն կապես փոկով, էգ սերմանէ, եւ թէ զձախն՝ նա որձ: Եւ գառն է կշտածծելովն բաժանեա առ ժամայն 'ի մօրէն, եւ 'ի յարգելք արա, որ այլ գեհն ընդ ոտնաք չտանին. բայց զի ծծցընելոյն ժամն ստէպ բեր զծնածսն եւ խառնեա, որ միշտ կուշտ կենան եւ ճարտար զարգանան: Եւ երբ երկու ամսոյ լինի՝ բաժանեա 'ի մօրէն, եւ զայլ ոչխարս յարօտ արա. եւ թէ այլ յերկար թողուս որ ծծեն, նա այլ գէր լինին: Եւ զկանխածինսն շոյտ բաժանեա եւ մեծացո եւ գիրացո, եւ կեր. զի ոչ լինին դիմացկոտք եւ ոչ յերկարապրեցք: