Գիրք վաստակոց

Հաւերուն՝ ջեր տուն պիտի եւ մխոտ, զերդ աղաւնէտան, պատուհանք փորելոյ եւ աղէկ թառեր. եւ դարմանն՝ առատ ծեծած եւ կեղեւած գարի, եւ կորեկ եւ թեփ, ընդ իրեար եփեա. եւ տուր շող որ ուտեն: Բայց ցորեանն միայն՝ վնասէ, մի՛ տար. եւ խաղողի կուտն վնաս է, ձու ածել չտայ: Եւ թէ կամիս գիրացուցանել հաւ՝ փետեա զթեւսն, եւ դի՛ր 'ի ջեր մթնագոյն տուն. եւ եփեա զթեփն հանած գարին եւ զծեծած կտաւատն, տուր որ ուտեն. եւ թէ գարէալիւր տաս եւ կտաւատ՝ աղէկ է: Եւ զջուրն տուր, եւ փոշէջուր արա գարէալիւրովն, եւ տուր. եւ կորեկն աղացած՝ աղէկ է. եւ հացմիջուկն գինւով:

Եւ զձուն թէ 'ի ձմեռն յալիւրն եւ յամառն 'ի թեփն պահես՝ շատ դիմանայ: Եւ են ոմանք որ 'ի յաղն պահեն, եւ աղն թերեցուցանէ զձուին մէջն: Եւ զթերեցածն 'ի յայն ճանաչես՝ որ ջուրն դնես, թէ 'ի տակն նստի՝ աղէկ է:

Եւ թէ խորոված ձուի դեղնուց եւ աղնձած չամիչ ծեծես եւ տաս հաւուն, զձուն մեծ բերէ եւ աղուոր, եւ չաւիրի շոյտ:

Եւ հաւտունն արձակ պիտի. եւ հանապազ ծծումբ եւ փիճւոյ տերեւ ծխեա, եւ եղին եղջիւրն, եւ մարդոյ մազ, որ ճիճի թէ բնակի՝ նա ահոկէ զնոսա:

ՎԵՐՋ