Գիրք վաստակոց

Տե՛ս երբ լինի լուսինն երեք աւուր եւ 'ի ծայրին վերայ զերթ մլար լինի՝ անձրեւոյ նշան է, նոյնպէս թէ 'ի չորս օրն լինի՝ նոյն ամպոյ նշան է: Եւ երբ տեսանես շուրջանակի լուսնին բակ կարմրագոյն եւ զերթ ջրախառն աղտոտ՝ շատ անձրեւոյ նշան է: Եւ երբ բոլորի լուսինն եւ տեսանես շուրջանակի թխագոյն ինչ՝ անձրեւոյ նշան է: Եւ թէ տեսանես 'ի շուրջն լուսնի զերթ կալ փողեր՝ բազում անձրեւաց նաշն է: Նոյնպէս երբ զլուսնին գոյնն թուխերանգ տեսանես՝ անձրեւ է: Եւ տե՛ս, երբ ցայթէ արեգակն եւ լինի կարմրագոյն եւ յետոյ թխագոյն՝ անձրեւոյ նշան է: Եւ տե՛ս 'ի մտանել արեգականն, եթէ կենայ 'ի ձախ դեհի վերայ ամպ մթնագոյն՝ նշան է անձրեւի: Եւ եթէ 'ի ցայթել արեգական տեսանես շուրջ զշառաւղօքն մթնագոյն ամպ՝ անձրեւոյ նշան է: Եւ կայծակունքն եւ որոտմունքն յոր դիհէ լինին, գիտելի ամենեցուն որ գուշակումն է անձրեւին՝ յոր դիհէ եւ լինի. բայց աւելորդաբար գրեցաք: Եւ երբ զկայծակմունքն այսինքն է զփայլատակունքն 'ի հիւսիսոյ եւ 'ի հարաւոյ դիհէն տեսանես, նշան է որ 'ի հարաւոյ անձրեւ գայ, եւ 'ի հիւսիսոյ հողմն: Եւ երբ տեսանես զջրային հասն, որ առաւել ընթանան եւ լոգանան 'ի ջուրն՝ անձրեւոյ նշան է: Եւ մեծագոյն տիրական գօտին այսինքն աղեղն՝ նշան է անձրեւի: Եւ յորժամ տեսանես զագռաւսն որ լոգանան 'ի ջուրն՝ անձրեւոյ նշան է: Եւ յորժամ զպախրէքն՝ որ 'ի հարաւոյ կողմն յերկար հային, անձրեւոյ նշան է: Եւ յորժամ տեսանես զմրջիւնքն որ զձուն իւրեանց 'ի մէկ ծակէն 'ի մէկ այլն կրեն՝ նշան է անձրեւի: Եւ յորժամ տեսանես զընտանի հաւն աւելի վազել եւ ճիշտել 'ի տեղաց 'ի տեղ՝ նշան է անձրեւի: Եւ յորժամ տեսանես զծիծառն աւելի խաղալ 'ի վերայ ջրոյն, նոյն անձրեւի նշան է: Եւ երբ պուտուկ կամ պղնձի որ 'ի վերայ կրակի լինի՝ տեսանես զկրակն իբրեւ զխանձառ մարգարտապէս հեղուիլ, նշան է անձրեւի: Եւ յորժամ զլոյս ճրագին մթնագոյն տեսանես, անձրեւի նշան է: Նոյնպէս եւ պախրէքն յորժամ տեսանես որ զիւրեանց զոտս լիզեն, եւ զիւրեանց թրիքն հոտոտան, նշան է անձրեւի: Եւ յորժամ մկունքն ճիշտեն աւելի՝ նշան է անձրեւի: Եւ յորժամ շունն փորէ զգետինն աւելի եւ իւր թեւելոյ տեղ զուգէ՝ նշան է անձրեւոյ: