Գիրք վաստակոց

Գիտելի է որ ամենայն ազգ խաղող չէ մէկ բնութեան, այլ զանազան են. եւ 'ի մէկ ժամ ոչ հասուցանեն զխաղողն՝ տունկքն: Զի կան որ կանուխ հասանին եւ կան որ անագան. են որ սեւ են, եւ են որ սպիտակ. են որ կարմիր, եւ են որ կանանչ. եւ որ երկայնապտուղք են եւ են որ բոլոր, եւ այլք միջակք. են որ քաղցր են, եւ են որ թթուահամ, եւ են որ փոթոթ. եւ զամէն մէկն ըստ բնութեան իւրոյ ազգին՝ պարտ է ստածել եւ շինել: Վասն այսորիկ չէ աղէկ զամէն ազգերն 'ի միասին տնկել, որք չիցեն հաւասարք, զի խանգարեալ աւերեն զմիմեանս. եւ այն կու աւերէ զգինին, որ զհասածն եւ զխակն հետ իրերաց կու խառնեն 'ի կթելն: Նոյնպէս եւ զսպիտակ խաղողն հետ սեւին չէ պարտ կթել, ապա թէ զատ զատ տնկես եւ 'ի շահ ածես՝ արժան է եւ լաւ: