Գիրք վաստակոց

Առ զպտղի ձիթի տուրտինն եւ լից 'ի պղինձ, մի եւ դիր գիշերն 'ի մէջ տանն. նա 'ի գիշերն ամէն մկունքն 'ի ներք լնանին եւ մեռանին: Առ սեւ խարբախ, եւ թէ աղէկ սպիտակ լինի, եւ աղա, եւ ընդ ալերն միացո, եւ լեսած պանիր եւս 'ի ներք խառնեա, եւ մեղրաջրով շաղախեա, եւ հայս արա եւ դիր. մուկն որ ուտէ՝ առժամայն սատակի: Եւ թէ առնու ոք զվայրի խիարկին տակն եւ զէնկիւժէնտն եւ ծեծէ եւ զալիւրն 'ի ձէթն խառնէ եւ թրէ եւ դնէ, առժամայն սպանանէ: Եւ թէ առնու ոք զվայրի խիարկին տակն եւ զշահմիհանտալին՝ եւ լեսած յիրեար խառնէ, եւ զնոյն անարատ եփէ 'ի ջուր եւ այն ջրովն զհայսն շաղախէ եւ ձգէ, նա սպանանէ զմկունսն: Եւ թէ առնու ոք զսպունգն եւ մկրատով կտրատէ մանր, այնպէս որ մուկն կարիցէ կլանել, եւ առնու զճրագուն հալէ եւ զկոտորսն սպունգին 'ի ներք լնու, եւ ցանէ 'ի տուն կամ 'ի դրունք, մուկն որ կլանէ՝, ուռչի 'ի փորն եւ առժամայն սպանանէ: