Գիրք վաստակոց

Պարտ է զմուստառին փրփուրն ստէպ սրբել 'ի բերանոյ կարասին, եւ են ոմանք որ հինգ օր չմօտին, եւ ապա յետ հինգ աւուրն սկսանին 'ի սրբել. ապա լաւն այն է որ ստէպ սրբեն զփրփուրն 'ի յառաջին եռէն 'ի վեր. զի թէ չսրբեն՝ նա 'ի փրփրէն որդն ծնանի եւ աւերէ զգինին: Եւ են ոմանք որ զկարասն շոյտ ծեփեն, եւ են որ անագան. ապա կանուխ ծածկելն զգինին քաղցր առնէ, եւ անագան ծածկելն՝ անուշահոտ. բայց ըստ քո կամացդ արա: Ապա թէ ուզես որ զերկուսն եւս ունենաս՝ զանուշահոտն եւ զքաղցրն, նա դու զկարասին զբերանն եղիգամբք կամ բարակ վարոցօք մուշապաք արա, ծածկեա, որ ծուխն 'ի միջոցացն ելանէ: Եւ թէ ուզես որ գինին պինտ քաղցրանայ, դու զայն դեղերն ձգեա, զորս յայլ տեղ գրեալ եմք: