Գիրք վաստակոց

Յոյժ օգտակար է եւ պիտանի, զոր 'ի գինւոյ տեղն խմես զոր գովեալ են իմաստունքն եւ բժշկապետքն, եւ իւրեանց համար են շինեալ: Ա՛ռ հին անձրեւի ջուր, եւ եփեա այնչափ որ յերեք բաժնէն մէկն երթայ. եւ ա՛ռ սպրկիկ մեղր 'ի փրփրէն սրբած, եւ 'ի ներք խառնեա, որ մայզես որ քաղցրութիւնն բաւական է. եւ լից յապիկած աման, եւ ծեփեա զբերանն, եւ փոքր ծմին թող որ շունչն ելանէ. եւ թող տասն օր, եւ բա՛ց եւ ա՛ռ զպէտքն, 'ի բան տար. եւ քանի հնանայ՝ նա գոված է:

Այլ. մեղրաջուր դամոնով յոյժ օգտակար ստամոքսին եւ պիտանի եւ գոված: Ա՛ռ մեղր 'ի փրփրէն յիստակած լիտր մի, եւ սպրկիկ դամոն թազէ կամ չոր 'ի կտէն սրբած նուկի չորս, եւ անձրեւի ջուր լիտր քսան. յիրեար խառնեա, եւ եփեա որ յերեքէն մէկն գնայ. եւ պարզեա եւ պահեա. եւ յետ երեք աւուր 'ի բան տար: