Գիրք վաստակոց

Եթէ ուզես որ 'ի ծառն պահես զնուռն, պուտուկներ ա՛ռ եւ 'ի ծառն կախեա. եւ զնուռն ճղերով 'ի ներք դի՛ր, եւ զբերանսն բռով ծեփեա. մնայ ողջ 'ի տարին: Եւ թէ ոք պրտուով քթոցի նման ղլէֆ շինէ նռան՝ զերդ կենայ 'ի ծառն, եւ բռով ծեփէ, մնայ աղէկ: Եւ ոմանք երկայն հոր փորեն, եւ զնուռն եւ զայլ մրգանին թառերով կախեն, եւ 'ի վերայ ծածկեն 'ի տեղ՝ որ ոչ գիջութիւն մտանէ եւ ոչ օդ: Եւ այլ. թանձր աղջուր արա, եւ զնուռն 'ի ներս մղեա, եւ դի՛ր որ ցամքի աղէկ 'ի յարեւն, եւ կախեա. աղէկ մնայ. բայց խիստ սմքեցուցանէ զտերեւն. երբ կամենաս ուտել, եղկջուր արա, եւ 'ի ներք պահ մի թրջոց դի՛ր, դալարանայ եւ զերդ նոր դառնայ:

Եւ թէ ոք առնու կաղնի փայտի սղոցուք եւ քացախով աղէկ մնշէ եւ ցամաքեցուցանէ, եւ զնուռն անդ թաղէ, աղէկ պահէ: