Գիրք վաստակոց

Զկեղեւն առանց ճեղքելոյ պարտ է պատրուսել, այսպէս. որ շինես 'ի պինտ չոր փայտէ բարակ դուր՝ պատրուսին չաքօք, եւ այնու ծակես եւ փրցընես պատրաստ զկեղեւն 'ի փայտէն, որ չճեղքի կեղեւն. եւ ապա զպատրոյսն դնես, զփայտն 'ի փայտին դեհն եւ զկեղեւն 'ի կեղեւին: Եւ թէ տափակ փայտիւ կապես յառաջ եւ ապա զկեղեւն դրովն փրցընես, այն է լաւ, որ չպայթի կեղեւն եւ ապա արձակեա զփոկն եւ դի՛ր զպատրոյսն:

Եւ այն ծառքն որոց կեղեւն նօսր լինի՝ այնք զջուրն խորու տանին. զայնպիսիսն ճեղքել պարտ է, եւ ապա զպատրոյսն դնել:

Եւ երբ կտրէ ոք զբազուկն՝ նա չէ պարտ յամեցուցանել, մենակ ճարտար դի՛ր զպատրոյսն եւ աղէկ հագո, եւ պակցո 'ի մայրանն, որ օդն չսմքեցուցանէ զինքն եւ սխալեցուցանէ: Եւ զպատրոյսն պարտ է յընտիր եւ 'ի բերուիկ ծառէ առնուլ, եւ զբերոյ ճիւղն եւ զայն՝ դնել. եւ որ պտկըներն յիրերաց մօտ ունենան՝ այն է լաւ, եւ 'ի մէջ ծառոյն առ այն է լաւ պատրուսելն: Եւ թէ կամենաս յարակ պահել, կաւ եւ կու եւ մարդոյ մազ լաւ է, յիրեար խառնեա, եւ կոխել տո՛ւր աղէկ, եւ զպատրուսացուն 'ի յինքն դի՛ր. շատ դալար մնայ. եւ քանի կարես՝ 'ի շիտակ եւ 'ի կոկկեղեւ ճիւղ պատրուսեա, մի՛ 'ի գչխայն: Եւ քանի ցած կարես պատրուսել՝ այն է լաւն: Եւ սղոցովն կտրելն լաւ է, եւ ապա սուր դանակով սրբել եւ դնել զպատրոյսն: Թէ հաստ լինի՝ 'ի մայրանն երկու երեք կամ չորս դի՛ր, եւ 'ի բարակն եւ 'ի վատուժն երկու մէն: Եւ պարտ է որ յառաջ մոմ ընդ ձիւթ խառնեալ կալնուս, եւ ապա 'ի վերայ խշով կամ կանափով պինտ կապես, եւ ապա աղէկ կաղճնով շաղախես 'ի վերայ, եւ քթեթով պնտես: Եւ պարտ է յամէն շաբաթ երկու հետ թանալ զկաւդ աղէկ, որ ջուր առնու պատրոյսն եւ թազէնայ, մինչեւ 'ի թէմուզ ամիսն. զի պատրուսին գարունն թէմուզն է: