Գիրք վաստակոց

Զգիջային տեղ սիրէ դեղձենին, եւ սակաւ ջրել ուզէ: Են ոմանք որ սակաւացուցանեն զճիւղսն եւ զբերն, նա սակաւն մեծ լինի: Եւ իւր կուտն այսպէս ցանուի. որ 'ի դեղձէն սակաւ մի 'ի վերայ կըտին թողուս: Եւ թէ ներքեւ դեղձենւոյն եւ խնձորենւոյն կարմիր վարդենիք տնկեն, նա դեղձն եւ խնձորն կարմիր լինին: Եւ դեղձենին բնութեամբ վատուժ է եւ անցուկ. բայց որ զինքն 'ի դամոնի կամ 'ի նշենի պատրուսէ, նա խիստ աղէկ է, եւ նմացական լինի ծառն, եւ անոյշ պտուղն: Եւ փորձած է, որ երբ պտուղ ունենայ, նա 'ի կըտին տեղն դամոն ընծայի, եւ 'ի դրուցէ դեղձ: Եւ թէ ուզես որ դեղձն 'ի յիւր ծառն առանց կըտի լինի, դու ա՛ռ 'ի յամուր փայտէ եւ սրեա երիթ եւ 'ի բունն զա՛րկ, որ զսրտուկն ճեղքէ եւ հանէ. եւ զերիթն 'ի տեղն թո՛ղ, եւ հողով աղբախառն ծածկեա եւ թո՛ղ. նա դեղձն անկուտ լինի: