Գիրք վաստակոց

Գիտելի է որ սպիտակ հողն եւ ոչ մքռայն եւ ոչ որ աղուոր երեսք ունենայ, աղէկ է. զի սպիտակ հողն ձմեռն պաղքաշ առնէ եւ աւերէ, եւ յամառն խիստ չորանայ, զի նօսր է, եւ այսու պիղծ է. եւ շատ աշխատանօք կարէ զինքն մարդ 'ի շահ ածել: Եւ մքռայն ամենեւին վատ է եւ պիղծ. զի կոկ գետինն ոչ խմէ զջուրն, այլ սահեցուցանէ. եւ այնու է վատ: Իսկ գետին՝ որ սեւ լինի եւ ծայր մի աւազուտ, եւ երբ խորու փորես՝ գէշ շաղախի հոտ գայ, եւ սեւ շաղախ լինի ներքեւատակն, այն է լաւ գետինն, յայն աշխատեա որ օգտէ 'ի բանջար եւ 'ի խոտեր: Եւ այսու ճանաչես. ա՛ռ 'ի հողէն եւ ցօղեա ջրով, եւ տե՛ս թէ աւազն շատ է քան զսեւ հողն, վատ է. եւ թէ հողն շատ է՝ աղէկ է: Եւ ա՛ռ 'ի հողէն շաղախ արա, եւ ընդ ափդ զարկ. թէ կաղճին է եւ փակչըտուկ որպէս կաւ՝ պիղծ է. եւ թէ փաղ լինի եւ փթրտուկ շաղախն, աղէկ է: