Գիրք վաստակոց

Սխտորն զսպիտակ եւ զփաղ գետինն սիրէ, որ չլինի կաղճին. եւ 'ի դեկտեմբերի ԺԱ օրն է իւր դնելն մինչեւ 'ի փետրվարի եօթն օրն. եւ որ զինքն 'ի փուլն դնէ եւ կրկին 'ի փուլն ժողովէ, նա ով ուտէ՝ հոտ չգայ 'ի բերանոյն: Եւ ինքնդ տաք է եւ չորային. զքամին վարէ, զպղղամն կտրէ, զգոզն վարէ, զճիճին 'ի փորն սպանանէ. եւ օձահարի եւ կորահարի եւ կատաղի խածածի օգտէ: Եւ թէ այրես եւ 'ի մեղրն խառնես եւ օծանես աղուեսացաւի օգտէ: Եւ աչացաւի՝ որ յաղբիւրն նասուր լինի, հոռմերէն Անոպիա ասեն, թէ օծանես օգտէ. եւ ակռացաւի օգտէ. զմաստի, արծուեաց օգտէ: Ծեծեալ եւ 'ի հոռոմ ձէթ խառնեալ եւ 'ի մեղր խառնեալ, կողացաւի օգտէ: Եւ վայրի սխտոր որ է սկորդօն, շատ ուժով է քան զտանուդ. եւ 'ի թրակիսին եւ 'ի մեծ մաճունն խիստ մտանէ. եւ զվերի օգտակարութիւնսն ունի, եւ այլ աւելի: