684 թուականի պատմութիւն

[ԽԳ. Գալուստ Իսրայեղի Մեծ Կողմանց եպիսկոպոսի ի Հոնաց. եւ երկու գլխաւորաց զկնի եկեալ՝ խնդրելով զնա յառաջնորդութիւն իւրեանց]
       1  Մեծ եւ բարեպաշտ իշխանն Հոնաց Իլիթուեր հանդերձեալ կազմէր ի գլխաւորաց աշխարհին իւրոյ զԻթգինն Խուրսանց եւ զՉաթն Խազր զկնի սրբոյն Իսրայեղի պատգամատարս սիրոյ եւ խնդրել զնոյն Իսրայէղ յառաջնորդութիւն Հոնաստանեայցն ։ 2  Եւ պատճեն թղթոյն էր այս.
       3  «Իմանալի աչաց տեսութեամբ ընկալաք զառաքեալդ ի ձէնջ՝ այրդ Աստուծոյ Իսրայէղ եպիսկոպոս եւ ընդ դորա ձեռն ողջոյնեմք զձեզ, տէ՛ր սուրբ Եղիազար՝ Աղուանից մեծ հայրապետ, եւ սիրելի եղբայր մեր Վարազ Տրդատ՝ աշխարհակալ իշխան Աղուանից։
       4  Վասն զի խնդրէիք մարմնաւոր խաղաղութիւն ի մէնջ, եւ մեք հոգեւոր ողջունիւ տեսաք զդա որպէս պատկեր Աստուծոյ եւ ի ձեռն դորա սրբական վարուց եւ նորահրաշ սքանչելեաց, զոր եցոյց բարձրեալն, ծանեաք զարարիչն մեր եւ ստացաք խաղաղութիւն հոգւոց մերոց։ 5  Եւ արդ խնդրեմք ի ձէնջ՝ զնոյն ինքն զԻսրայէղդ տեսուչ եւ առաջնորդ մեզ շնորհեցէք, յորոյ ձեռն գտաք բազումք զփրկութիւն յաւիտենից, զի եւ մեր ընդ ձեզ անքակ սէր հաստատեսցի։ 6  Ո՛ղջ լերուք ի Տէր »։