Գանձեր եւ Տաղեր

ԻԶ. ՔԱՐՈԶ ԱՍԱՑԵԱԼ Ի ՍՈՒՐԲ ԼՈՒՍԱՒՈՐԻՉՆ ԳՐԻԳՈՐ

Գերահրաշ ցնծութեամբ բերկրեալ մանկունք Սիոնի

Տաւնեն զաւր քո յիշատակի.

Սիրալիր բաղձմամբ զմեծի վկայիդ

Եւ գհովուիգ հաւտիցս բանական` սրբոյդ Գրիգորի։

Հայցմամբ մաղթանաց, սրտառուչ արտասուաւք

Աղերսեմք րաբունւոյդ եւ հաւրդ բարի`

Գթալ սիրաբար յորդիսս քո,

Երկամբք ծնեալ յարգանդի ի ծոց համայնց

Եւ բնաւից մաւրն աւագանի,

Աղաչանս աղերսիւք մատուսցես տաւնողացս այնմ,

Որ բանիւ զաւրութեամբ բերէ զմասունս բոլորից`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք։

 

Րամից բոլորից ազանց գտար գերագոյն որդւոցս Ադամայ.

Հրաշիւք զարմացմամբ չարասէր տիրասպան հարց`

Զաւակ տիրատուր եւ որդի բարեսէր.

Ի փշաբեր ոստոց` ծաղիկ վարդից բուսեալ,

Քրքում եւ շուշան հովտաց վայելուչ,

Բոյս ի գաւսացեալ արմատոյ`

Տնկեալ ի գնացս գետոց պտղալից

Եւ կերակրեալ զորդիս նորոյ Սիոնի զքաղցեալսն հացին կենաց երկնայնոյ.

Ի քարանց բղխեալ բարեհամ բաժակ զովարար`

Պասքեալ որդւոցս Եւայի ազանց Հայկազնեայ.

Մաղթեսցես առ Տէր վասն մեր ընտրողին,

Զքեզ կոչողին եւ պսակողին`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք։

 

Ի թանձրասփիւռ անաստուած խաւարէ

Ածար ի տունս լուսոյ աստուածգիտութեան մանուկ դեռաբոյս,

Ուր զկրկինս արբեր զկաթինս ի ստեանցն եղեալ Սիոնի,

Յարբումն մանկանց զՆոր եւ զՀին կտակարանս հոգեբուղխ,

Յորմէ կերակրեալ զմայլմամբ

Ի չափ հասեր կատարման այրացելոյն Յիսուսի եւ Փրկչին բոլորից,

Խորին խորհրդոց նորին եղեր հասու ըստ Պաւղոսի եւ հազարապետ.

Անթարգմանելի ծածկեալ խորհրդոյն` յայտնիչ վարդապետ եւ քարոզ.

Բարերար կամաւք բարեխաւսեա՛ Աստուծոյ,

Ստեղծողին յոչ գոյից, տածողի եւ դարմանողի`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք։

Գերագոյն գնդին մետասան քարոզ աշխարհի եւ աղ համեմիչ.

Իմանալի լցեալ լուսով ծագեցար ի մտիցն արեւու`

Կողմանցն հիւսիսոյ` խաւարաբնակ որդւոց Թորգոմայ,

Յորոց վերայ եդեալ ի մահ, հովիւդ արի,

Զմարմինդ քաջաբար մատուցեր, որպէս եւ Տէրն ի խաչին,

Թիւ երկոտասան կրեալ յանձին գանուածս խոցից

Ընդ բնաւից մարդկան մեղաց համայնից,

Ի գուբն աւձաբորբ բնակեալ կրկին վեցիւք ամաւք եւ մի խորհրդեամբ.

Մաքրեալ զթափուածս թունից մահաբեր աւձին,

Անմարմին տնաւրինեցեր անդուստ առ աւձիցն.

Մաղթեա՛ մաքրել զմեզ ի թունից կամակոր վիշապին առ Հայրն երկնաւոր`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք։

 

Որդւոց մարդկան նստեաց ի խաւարի,

Ծագեցար լոյս յանլոյսն վայրէ իմանալի եւ արփիական,

Դեղ սաստից դիւացն եւ բուժիչ հոգւոց մերոց,

Ընդ անմարմնոցն դասսն ելեալ,

Կարգեցար եւ բաշխեցար ի մեզ փրկութիւն.

Զարքայն յանբանից բնութենէն դարձուցեալ` ի մարդ

Փոխեցեր, զիշխանսն աւագաւքն եւ զաւրաւքն` զգաստացուցեր,

Զբոլոր աշխարհին զբնակիչսն` ի դիւացն իշխանութենէ զերծուցեր.

Յորդիս լուսոյ եւ տուընջեան երկնաւորին Հաւր`

Յարգանդէ աւագանին վերագրեցեր,

Արեամբ անձինդ եւ երկամբք տանջանաց`

Ժողովուրդ քեզ սեպհականեցեր.

Հայցմամբ մաղթեսցես առ յոյսն բնաւից` Յիսուս եւ Տէր բոլորից`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք:

 

Րաբուն բարի, վարդապետ խոհեմ

Եւ քարոզ կենացն բանի, տէր սուրբ Գրիգոր,

Գեղեցկագնաց համբաւուք բարութեան աւետարանիչ Սիոնի,

Պատմող անհասիցն եւ յայտնող անգիւտիցն,

Զանպարագիծն Աստուած յայտնեցեր ազգին մոլորեալ.

Զերից անձանց միութիւն՝ բնութեամբ տէրութեանն,

Յորմէ համայնքս բերին,

Ուսուցեր անգիւտից մարդկան խաւարեալ

Զանուր եւ զաներբ ծննդեամբ Որդին ի մարմին թափեալ.

Վարժիւք զանգէտսն իմաստնացուցեր,

Կեանք անվախճան եւ մահ մահու ծանուցեր,

Մահուամբ նորա ի խաչին` սեռի մարդկութեանս

Ժառանգս Աստուծոյ եւ եղբայր Քրիստոսի

Յարութեամբ յետ մահու քարոզեցեր,

Շնորհաւք Հոգւոյն նորափետուր զարդարեալ,

Լուսափայլ կերպիւ զԱդամ ծննդովք իւրովք դարձեալ ձայնեցեր.

Սիրաբորբոք սրտիւ մաղթեսցես առ շնորհաբաշխ Հոգին Աստուած`

Ընդ մեզ լինել հանապազ`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք։

 

Իսկապէս կոչմամբ վերին դիտմանցն ազդիւք

Կարգեցար հայրապետ եւ փեսայ եկեղեցւոյ Քրիստոսի, տէր սուրբ Գրիգոր.

Բաշխող շնորհաց Հոգւոյն Սրբոյ մանկանց բոլորից,

Երկամբք քո ծնեալ որդւոց դստեր Սիոնի,

Զոր արկեալ հոսմամբ գետաւրէն յաշխարհն Հայաստան,

Մաքրեցեր, լուսաւորեցեր եւ կատարեցեր զթոռունսն Ազքանազու.

Զաւտարսն ընտանիս եւ զհեռաւորսն մերձաւորս ընդ դուռն Յիսուսի,

Առեալ ի տուն Հոգւոյն Աստուծոյ եւ ի ծոցն Հաւր.

Հայրաւրէն տածեալ զորդիսն Աստուծոյ,

Կաթամբ մայրաբար դիեցուցեր զերկամբք քո ծնեալ զզաւակսն անհամարս.

Զմիշտ մեռեալն եւ զանմահն`

Պատարագ եւ նուէր ընդ մարդկան մատուցեր Աստուծոյ հաշտութեան,

Որպէս եւ ինքն ի խաչին.

Յետ բնաւիցս կատարման միանձնական ճգնեալ վարուք,

Վայելմամբ սիրոյն Քրիստոսի փոխեցար ի ծոցն հայրենի.

Մաղթեա որում մերձ ես եւ Հուպ երից անձանց եւ մի տէրութեան`

Շնորհել զպարգեւս քաւութեան եւ զձիրս ողորմութեան

Հաւտիցս բանական որդւոց մարդկան, աղաչեմք։

 

Գերագոյն մաքրութեամբ երեւեալ

Փայլեցար յորդիս Սիոնի, տէր սուրբ Գրիգոր,

Առաւել ծագմամբ լցեալ որպէս յաստեղս արեգակն

Մետասան գնդին գերագոյն քարոզ աշխարհի,

Հետեւողաց նոցին հայրապետաց վեհագոյն` արի եւ քաջ հովիւ,

Արեամբ անձինդ հաւտիցս քո ստացող,

Մեծդ ի վկայս եւ անբաղդատ բնաւից արեամբ պսակելոց,

Մարգարէիցն առաւել գիտող զխորհուրդն Յիսուսի,

Միանձանց կրաւնիցն գլուխ եւ պետ ստուգապէս,

Մարդ երկնային եւ հրեշտակ երկրային,

Սերովբէ հողեղէն եւ քերովբէ նիւթական,

Աթոռ մարմնեղէն եւ հանգիստ կամաց մեծին Աստուծոյ,

Աղաչեմք զքեզ հայցմամբ մաղթել առ Տէր

Վասն բնաւից մարդկան երկրաւորաց,

Հայրապետաց ուղիղ վարդապետութիւն.

Եպիսկոպոսաց եւ քահանայից` անբիծ շնորհաբաշխութիւն.

Սարկաւագաց, դպրաց եւ ամենայն ուխտի մանկանց եկեղեցւոյ`

Մաքրութիւն, սրբութիւն եւ արդարութիւն.

Թագաւորաց եւ իշխանաց` քաջութիւն եւ ուղիղ դատողութիւն.

Զաւրաց եւ զաւրավարաց եւ համաւրէն արանց եւ կանանց`

Առողջութիւն եւ ճշմարիտ խոստովանութիւն.

Ննջեցելոցն հանգիստ եւ կենաց յարութիւն.

Ահա յիշեսցես եւ ողորմեսցիս ննջեցելոցն

Յուսով յարութեան, խնդրեմք։

 

Առաւել եւ եւս

Զյորդորումն սիրոյ եւ զգործս բարեաց պարգեւել մեզ, խնդրեմք:

Նորոգել զանձինս եւ զմիմեանս

Տեառն Աստուծոյ ամենակալի յանձն առնել, աղաչեմք։

 

ՓՈԽ Ձայնիւ գոչմամբ, արտասուաց մաղթանաւք

Հայցեմք ի քէն, Տէր բոլորից, սուրբ Երրորդութիւն,

Ստեղծիչ յանէից համայնից բնաւիցս եղելոց,

Յաւրինող մերոյ բնութեանս կրկին կենդանեաւք ի մի միութիւն,

Մարմնաւոր անմարմին եւ մարմին հոգեւոր ի պատկեր եւ ի ձեւս քո,

Խնամող եւ տածիչ, դարմանող աննիւթիցն եւ նիւթականացս,

Անկերոյ բնութեանս յարուցիչ եւ փրկող առաջին մարդոյն Ադամայ,

Գթած, մարդասէր, առատ բարերար,

Հայցմամբ Իսկուհւոյ Մարիամու Աստուածածնի`

Մաւր Բանին մարմնացելոյ,

Աղաչանաւք Կարապետին Յովհաննու`

Հաւր ձայնի լսողի, Որդւոյդ Մկրտչի,

Եւ Հոգւոյդ տեսողի ի ձեւս աղաւնւոյ,

Արեամբ առաջին վկային մաղթանաւք`

Զքեզ ընդ աջմէ Հաւր տեսողին, սրբոյն Ստեփանոսի,

Աղերսարկու ճգնութեամբ սրբոյն Գրիգորի, որոյ այսաւր է յիշատակ,

Պաղատանաւք առաքելոց եւ մարգարէից

Եւ արի երջանկաց մարտիրոսացն կատարելոց,

Մշտապաշտաւն բազկատարածութեամբ

Մաքուր միանձանց ճգնաւորացն դասուց,

Շնորհեա՛ աշխարհի զխաղաղութիւն եւ եկեղեցւոյ զանշարժութիւն,

Առաջնորդաց ուղղութիւն եւ քահանայից սրբութիւն,

Եւ համաւրէն ժողովրդեան քում քաւութիւն եւ ողորմութիւն։ Եւ այժմ ողորմեա՛ց մեզ, Տէր Աստուած մեր,

Ըստ մեծի ողորմութեան քում։