Գանձեր եւ Տաղեր

ԻԷ. ՔԱՐՈԶ ԵԿԵՂԵՑՒՈՅ ԵԻ ՏԱՊԱՆԱԿԻՆ ՏԵԱՌՆ, ԳՐԻԳՈՐԻ ՆԱՐԵԿԱՅ

Ժողովեալքս ամենեքեան ի սուրբ կաթողիկէ առաքելական եկեղեցի,

Գրգեմք ի սմա, յոգնախմբեան փառաբանութեամբ երկրային պարաւորքս`

Ի հոյլս հոգեղէնըս, հրաշազանութեամբ

Ընդ արփիափայլ սեռիցըն պարակցեալ.

Աւրհնեմք զեկաւորիլդ ի քեզ`

Ամենասուրբ Երրորդութեան, աղաչեմք։

Որ բարձրացեալդ ես ի կամարըս քերովբէից չորեքդիմեան դիտանոցին,

Եւ ի պարուց բոլորից եւ ի հրաշատեսակ սեռիցն երկըրպագիս`

Երրեակ իսկութիւն,

Կամեցար ի ձեռըն սրբոց առաքելոցն հաստատել ըզվէմըս զայս`

Անպարտելի քաղաք կամակար հրաշիւք,

Քառակերպեան` ի մէջ տիեզերաց.

Պայծառացուցեր ըզսա ի հիմունըս շողաձիգ

Տապախառըն լուսափայլութեամբ,

Եւ շքեղազարդ վայելչապանծ յաւրինեցեր ըզսա դշխոյ`

Դուստր վերին Սիոնի,

Յորմէ յոգնաձայնիւ ջոկք, որ ի սմա`

Զվերնականսըն հնչեցուցանեն.

Աւրհնեմք զեկաւորիլդ ի քեզ`

Ամենասուրբ Երրորդութեան, աղաչեմք։

 

Անեղաշէն խորան, կաթողիկէ սուրբ,

Որ հիմնեցար ի մէջ տիեզերաց այսաւր սուրբ եկեղեցի,

Յաւրինակ արարչագործ եւ գեղեցկատեսիլ

Եդեմատունկ դրախտին փափկութեան,

Զոր սերովբէք եւ քերովբէք, հրամանաւ անեղին,

Շրջափակեալ պահէին ըզճանապարհս ծառոյն գիտութեան,

Բացաւ մեծ ամրածածուկ դրախտին փափկութիւնքն,

Եւ մեք, պայծառազուարճ համարձակութեամբ երկրային պարաւորքս,

Ընդ արփիափայլ սերովբէիցն պարակցեալ.

Աւրհնեմք զեկաւորիլդ ի քեզ`  

Ամենասուրբ Երրորդութեան, աղաչեմք։

 

Անճառելի խորան, պայծառահրաշ լուսաւորութեամբըս

Հաստատեցար ի մէջ տիեզերաց այսաւր սուրբ եկեղեցի,

Աւրինակ բարձրագումբէթ տապանին,

Զոր նահապետին Նոյի, հրամանաւ Արարչին

Հիմունս արկեալ ի յանփուտ փայտից,

Կազմէր ըզտապանն` ի փրկութիւն բազմահոյլ կենդանեացն,

Ապրեցուցանել զապաւինեալսն

Ի սահանահոս ալեաց ջուրցն սաստկութեան.

Այսաւր ի ձեռն արփից գոյացաւղին գոյացեալ,

Երեւեցաւ մեզ փոխանակ տապանին` սուրբ Սիոն,

Բանաւոր գառանց ժողովըրդեանն,

Լուսափայլ հրաշիցն աշտիճան համագունդ փառաբանութեամբ. 

Աւրհնեմք զեկաւորիլդ ի քեզ`

Ամենասուրբ Երրորդութեան, աղաչեմք։

Արփիափայլ խորան, արեգակնահրաշ ճառագայթիւք ջահաւորեալ,

Ի մէջ տիեզերաց այսաւր սուրբ եկեղեցի.

Աւրինակ խորանին, զոր նահապետն Աբրահամ,

Նստելով ի վերայ սեմոց դրանց երկնից,

Դիտելով ընդ երկինս եւ ընդ երկիր,

Ուստի Տէրըն տերանց երեւեալ երկու զուարթնաւքն,

Եկն եհաս առ ծառն հովանաւոր,

Հատուցանելով սիրելեացն ըզփոխարէնըս բարեացն,

Զոր եւ Աբրահամու ընթացեալ,

Որթս դիեցիկս եւ երիս նկանակս

Մատուցանէր Տեառն Աստուծոյ պատարագս.

Այսաւր նոյն ինքն ի քեզ Աստուած  եկաւորի, սուրբ Սիոն,

Երկնանման քաւարան մեղաւորաց,

Առ ջուրս հանգստեան ըզմանկունըս քո սնուցանելով,

Յորմէ ծնունդք աւագանին

Եւ պետութիւնք սրովբէաճոխ վերին հրաշիցն

Ի միասին պարակցեալ.

Աւրհնեմք զեկաւորիլդ ի քեզ` 

Ամենասուրբ Երրորդութեան, աղաչեմք։

 

Քառանկիւն տաճար` գերահրաշ ծագմամբ,

Զթափանցիկ լուսով ճառագայթեալ

Ի մէջ տիեզերաց այսաւր, սուրբ եկեղեցի.

Աւրինակ տապանակին, զոր Մովսէս կազմէր

Ի մէջ իսրայէլագունդ ժողովոյն,

Դնելով ի նմա ըզբուրվառն ոսկի շուրջանափայլ խոյակաւք,

Որ բուրէր զանոյշահոտութիւն կնդըրկացն, որ ի նմա.

Սափորն ոսկի լի մանանայիւ,

Հանդերձ քարեղէն կտակարանաւքն.

Եւ ծաղկեալ գաւազանն, որ ի նմա,

Այսաւր ի ձեռն զՄելքիսեդեկի քահանայի

Միշտ ի քեզ երեւի փոխանակ տեառնագրեալ տախտակացն.

Արեգակնափայլ սեղանն` բարձաւղ անոյշահոտ   պատարագին,

Տեղադրելով հաստատի ի քեզ, սուրբ Սիոն, մայր եկեղեցի,

Յոր դասք երկրածին կենդանեաց

Եւ գունդք սրովբէաճոխ վեհիցն ի միասին պարակցեալ.

Աւրհնեմք զեկաւորիլդ ի քեզ`

Ամենասուրբ Երրորդութեան, աղաչեմք։

 

Քառաջահեան տաճար,

Գերահրաշ ճառագայթիւքն լուսաւորեալ ի մէջ Տիեզերաց սուրբ եկեղեցի,

Աւրինակ գնդակահրաշ եւ լուսազարդ սրահիցըն ոսկիաձոյլ խընկաւք,

Զոր եւ իմաստունն Սողոմոն

Առեալ ի մայրից եւ յեղեւնափայտից,

Կազմէր զոսկիափայլ ըզտաճարն

Ի տեսակս համապայծառս եւթնաճրագ աշտանակաւք,

Եւ գեղապարունակ շուշանագործ հրաշիւք`

Զոսկիական քերովբէսն,

Եւ հաստատէ ի տուն Աստուծոյ.

Աւրհնեմք զեկաւորիլդ ի քեզ`

Ամենասուրբ Երրորդութեան, աղաչեմք։

 

Փախուցելոցն պատսպարան եւ յարկ բնակութեան,

Քաղաք ապաստանի եւ տուն քաւութեան,

Աղաչեմք ըզբնակեալն ի քեզ անքակ միութեամբ ըզթագաւորն երկնաւոր,

Շնորհել մեզ զխաղաղութիւն զերկնային, ըզհոգեւոր եւ զիմանալին,

Պահելով ի ներկայումս

Յերեւելի եւ յաներեւոյթ ընդդիմամարտ հակառակ զաւրութեանցն,

Եւ յաներեկի աւուրըն ծագման փառաց մեծի զաւրութեան,

Ընդ սրբասնելոցն ի լոյս` բերկրիլ յուրախութիւնն անպայման.

Ահա յիշեսցես եւ. ողորմեսցիս ննեջեցելոցն` 

Յուսով յարութեան, խնդրեմք։

 

Եւ եւս առաւել

զյորդորումն սիրոյ եւ զգործս բարեաց պարգեւել մեզ, խնդրեմք։

 

Զանձինս մեր եւ զմիմեանս

Տեառն Աստուծոյ ամենակալի յանձն արասցուք, խնդրեմք։

 

Բարեխաւսութեամբ ամէնաւրհնեալ Տիրուհւոյ Աստուածածնին  

Եւ միշտ  կուսին  Մարիամու,  

Մաղթանաւք մեծի մարգարէին Կարապետի Յովհաննու,

Աղաւթիւք խաչակից քոց չարչարանաց

Նախավկային քո` Ստեփանոսի,

Խնդրուածովք խոստովանողին ըգքեզ

Սրբոյն Գրիգորի` հաւատարիմ քահանայապետին, 

Հայցմամբ համաւրէն ըգքեզ սիրողաց`

Առաքելոց եւ  մարգարէից։ 

Եւ  այժմ ողորմեա՛ց մեզ, Տէր  Աստուած մեր,

Ըստ մեծի ողորմութեան քում։