Գանձեր եւ Տաղեր

Լ. ՔԱՐՈԶ ՍՐԲՈՅ ԽԱՉԻՆ, ԳՐԻԳՈՐԻ ՆԱՐԵԿԱՑՒՈՅ ԱՍԱՑԵԱԼ

Գանձ անքնին, ծածկեալ մենութիւն,

Զաւրեղ ահաւոր, միշտ բարի.

Եւ երեքսրբեան անսահմանելի` աւրհնանուն կենդանի.

Անճառ իսկութիւն փակեալ ի զգալեաց, համագոյ անթարգմանելի,

Անհասանելի հեռաւոր եւ անընդմիջելի մերձաւոր, անմահ թագաւոր.

Ահա խնկեսցին մաղթանք մեր առաջի քո, Ամենակալ, աղաչեմք:

 

Րոպէից համայնից Էից ի կուսից քառից

Ի մի եղելութիւն զերկիր հաստատեցեր,

Խորհուրդ կրկին ձեռնարկ վերստին,

Ընդդիմակ միջոց միջնորդաց երկուց եղծմանց

Եւ նորոգութեան, տեսութեան կենացդ փայտի:

Ահա խնկեսցին մաղթանք մեր առաջի քո, Ամենակալ, աղաչեմք։

 

Ի բարձունս անբաւս` անհետազաւտելի,

Գովեստիւ տաւնեալ` ահեղ անմատոյց,

Յանհանգչելի նուագ ներբողից ազգաց հրանիւթից

Պանծալի երգով պսակեալ զքեգ Աստուած բոլորից.

Ի սահմանս երկրակշռութեանց երկնից,

Ի թեւս չորից արփիակերպից,

Բազմաւք կարգեցեր քեռ պատիւս անպատումս.

Ի դրախտն Ադենայ ի տնկոյն պարտեալ,

Ազդեալ ձայնեցեր ի ծառն աւրհնութեան։

Ահա խնկեսցին մաղթանք մեր առաջի քո, Ամենակալ, աղաչեմք։

 

Գուշակ գարնայնոյ ի թռիչս ամբարձման,

Յաւրինակ երկնի կամաց գթածիդ`

Ի լաստն ամրացոյ Նոյեան տապանին.

Պատկեր փրկութեան կերպարան հրաշից ապաստան յուսոյ

Գեր ի վերնայինսն զնոր ժողովուրդս ուխտիւ միջնորդեալ

Ի թեւս խաչիդ առ քեզ մատուսցես.

Ահա խնկեսցին մաղթանք մեր առաջի քո, Ամենակալ, աղաչեմք։

 

Ո՜վ գիր մատենի մատինդ Աստուծոյ,

Կենսունակ տախտակ անխորտակելի

Եւ աւանդ նորոյ աւրինի սրբամասնութեանց անեղծանելի.

Լրումն ցուցմանց կանխապատմութեանց աւետեաց ըղձից,

Ի բիւրուց հիւթից մեզ ի յաւգնութիւն սոյն իսկ ծանուցար.

Տիպ պաշտելի գրաւ աշխարհի,

Շաւիղ անհետազաւտելի արեամբ Արարչին նկարեալ ի փառս լուսոյ.

Ահա խնկեսցին դարձեալ խնդրուածք մեր առաջի քո, Ամենակալ, աղաչեմք։

 

Րաբունեաց պետ եւ ձիր իմաստից Տէր Յիսուս Քրիստոս,

Միայն ուսուցիչ զանիմանալիսն` որ ոչ գծագրի յայսմ  յաւիտենիս,

Պատկեր Հաւր անհաս, ի վեր` քան զբան, ուղղեալ յայս նշան

Հաստատեա սովին պնդութեամբ զսիւնս աշխարհի,

Պահեալ ամրութեամբ ըստ քումդ իրաւանց`

Զհովուապետն խաշանց քոց բանաւորաց

Զհայրապետն մեր` զտէր [այս անուն]

Զեպիսկոպոսունս` երիցամբք եւ սարկաւագաւք,

Զվարդապետս` դպրաւք եւ բնաւին իսկ պաշտաւնէիւք եկեղեցականաւք,

Զթագաւորն մեր իւրովք ծննդովք,

Հանդերձ պետական նահանգաւք հնազանդեցելովք։

Արասցես լինել երկիւղածութեամբ սրտի

Խաչիդ պարծանաց ի քեզ զաւրացեալ:

Ահա խնկեսցին դարձեալ խնդրուածք մեր առաջի քո, ամենակալ, աղաչեմք։

 

Ի քեզ համբառնամք զձեռս եւ զսիրտս

Եւ զզգայութիւնս հոգւոց իմաստից։

Արձանացուսցես զմեզ անշարժ պնդութեամբ

Ընդ հովանեաւ թեւոց սուրբ խաչիդ,

Զարքայութիւնն՝ յաղթող, զդատողութիւնն՝ անպատիժ,

Զիշխանականսն՝ հանդարտս, զզինուորութիւնսն՝ խրատեալս,

Ձիավարժիցն տուր սանձս, սոսկականացն` անբծութիւն,

Հետեւակացն՝ խրախոյս, քաղաքայնոցն` պատուէր,

Նուիրողացն՝ լրութիւն, ուխտաւորացն` սփոփանս,

Ննջեցելոցն՝ հանգիստ, եւ համաւրէն ժողովրդեան քում

Սովիմբ` ամրութիւն, պաշտպանութիւն,

Քաւութիւն և առողջութիւն,   աւրհնեա՜լ յաւիտեանս.

Ահա յիշեսցես եւ ողորմեսցիս ննջեցելոցն

Յուսով յարութեան, խնդրեմք։

Եւ եւս առաւել

Զյորդորումն սիրոյ եւ զգործս բարեաց պարգեւել մեզ`   խնդրեմք։

 

Րոտել զմարմինս մեր

Ի մի շաւիղ ընտրութեան հոգւոյ սիրոյն որ առ Տէր, խնդրեմք։

 

ՓՈԽ Գոհաբանութիւն խնամոց խնդրողին զխաղաղութիւն միշտ երկրպագուացս,

Պաշտպանութեամբ ծնողի փրկչին եւ մարմնարանի անպարագրելի

Սրբոյն Մարիամու Աստուածածնի եւ միշտ Կուսի,

Աղերսիւ եւ աղաչանաւք Մկրտչին`

Ջուրբ զՀոգին հրաւիրողի Կարապետին մեծին Յովաննու,

Պաղատանաւք թագաւորելոցն աւծութեամբ Հոգւոյն

Առաքելոցն սրբազգեստից,

Նահատակութեամբ նախկին վկային քո` սրբոյն Ստեփանոսի,

Որ է որդի անդրանիկ փրկագործ կրից երկրորդն Ադամայ,

Արգահատութեամբ եւ աղաւթիւք արի երջանկաց՝

Մարտիրոսացն կատարելոց.

Խոստովանողական դաւանութեամբ սրբոյն Գրիգորի`

Հայաստանեայցս լուսաւորչի եւ յանմերձենալիսն նուիրողի,

Մշտապաշտաւն բազկատարածութեամբ

Մաքուր միանձանց, եւ ամենայն ընտրելոց

Պսակելոցն ընդ քեզ խաչակիր վարուք յաւուրն մեծի։

Եւ այժմ ողորմեաց մեզ, Տէր Աստուած մեր,

Ըստ մեծի ողորմութեան քում։