Տաղեր

Ո՛վ Աբրահամ, եղբայր բարի,
Անւանակցին քո նմանի
Եւ կամ սրբոյն Ստեփաննոսի,
Նախավկայ սարկաւագի:

Եւ մայրն քո է մեծազգի,
Նման դշխոյն Հեղինէի,
Կամ Սառայի եւ Ռաբեկի
Եւ կամ կանանցն եւղաբերի:

Քոյր քո նման Հռիփսիմէի,
Կատարինէ եւ Վառվառի,
Հաւատարիմ ՚ւ երկիւղալի,
Աղօթասէր ՚ւ առաքինի:

Եղբայրն քո սուրբ ՚ւ բարի,
Անմեղ ՚ւ անպարտ քան զաղաւնի,
Լուծեալ անդամ մեղս ոչ ունի,
Արքայութեան է արժանի:

Տիկինն քո նման Աննայի,
Մօր սուրբ կուսին Աստուածածնի,
Կամ մօրն սուրբ Սամուէլի,
Ազգ եւ ազինք քահանայի:

Եւ Ուլուպին զաւակ բարի,
Տեառն օրհնութեանց իսկ արժանի,
Յերկար ամօք նա ծերասցի
Եւ քահանայ Տեառն լինի:

Փոքր Սարգիս ՚ւ այլք որ լինի,
Նման Պետրոսի եւ Պօղոսի,
Ձեզ յիշատակ բարի լիցի
Եւ յամենայն չարեաց փրկի:

Ստեփանոս դու Թոխաթցի,
Եղուկ հազար եւ վայ քեզի,
Դու պարտական բիւր քանքարի,
Անգէտ, յիմար եւ փանաքի:

Հայր մեր յերկինս մեզ ասողի,
Մեղքն մաքրի եւ ջնջեսցի: