Կամենից

(Նուիրակս առաքէ զԶաքարիս վարդապետ եւ զԴաւիթ եպիսկոպոս).

Ի գերագոյ ի գերակա եւ ի գերադրական ի գերահրաշ ի գերազանց եւ ի գերաճառ յամենասուրբ Երրորդութենէն, ի յանսկիզբն Հօրէն, ի յանհաս Բանէն, ի Հոգոյն ճշմարտէն, եւ ի միակութենէն եւ ի մի բնութենէն եւ մի գոյութենէն, եւ ի միապէս բարոյն, ի մի Աստուած գոլոյն, անձամբ եւ անուամբ բաժանելոյն, այլ ամենայնիւ մի կալոյն. Եւ ի գերագայ ի մեծահամբաւ ի բազմալուր սուրբ մենաստանէս, ի Վաղարշապատու սուրբ աթոռոյս Էջմիածնա ասոտւածակազմ լուսոյն. Եւ ի սոցին սպսսաւորէ ի Տէր Մելքիսէթ Կաթողիկոսէ ամենայն Հայոց, եւ ի տէր Ստեփաննոս վարդապետէ, եւ ի Տէր Ստեփաննոս եպիսկոպոսէ, եւ ի Տէր Կարապետ վարդապետէ, եւ ի Տէր Յովհաննէս վարդապետէ. Նա եւ Ստեթաննոս արհի եպիսկոպոսէ, այլ եւ ի Զաքարիայ վարդապետէ, եւ յայլ միեղէն եղբարցս՝ որ աստ կան հաւագեալ ի Ս. Էջմիածինս. Հասցէ յիսուսաւանդ ողջոյն եւ առաքելական աւրհնութիւն ի վերայ տիրախնամ եւ աստուածապահ քաղաքացդ. Նախ եւ առաջին Իլախաց երկրիդ մայրաքաղաքիդ Իլովա. եպիսկոպոսացդ, քահանայիցդ, եւ ԲԺն (երկոտասան) Դատաւորացդ, եւ պարոն տօլվաթաւորացդ, եւ հաւասար քրիստոնէիցդ, մեծի եւ փոքու առ հասարակ. ամէն: Երկրորդ, Կամէնիսու քահանայիցդ եւ պարոն տօլվաթաւորացդ եւ հաւասար քրիստոնէիցդ. ամէն: Երրորդ, Սէչովու քահանայից եւ պարոն տօլվաթաւորացդ, եւ բովանդակ քրիստոնէիցդ. ամէն: Չորրորդ, Եաշու քահանայիցդ եւ պարոն տօլվաթաւորացդ, եւ հաւասար քրիստոնէիցդ. ամէն. եւ Ֆռանկաստանու քրիստոնէիցդ առ հասարակ ամենեցուն ամենայնի. ամէն:

Աւրհնեալ է Հայրն Աստուած անեղածին անժամանակ. գովեալ Որդին միածին Բանն Հաւր, ծագումն անճառ, լոյս եւ ճառագոյթ. բարեբանեալ Հոգին Աստուած ճշմարիտ, բխումն անսպառ եւ բաշխօղ բարութեան. որպէս աւրհնեաց զդասս հրեշտակից եւ զկաանս անմարմնոց, նոյն աւրհնութեամբն եւ զձեզ աւրհնեսցէ արարիչն Աստուած, զդասս եւ զգումարս ձեր, զազգս եւ զտոհմս ձեր, զարկս (զյարկս) եւ զկայանս ձեր, զտունս եւ զբնակութիւնս ձեր. Եւ որպէս աւրհնեաց զդրախտն Ադինեա եւ ի նմա զմարդն առաջին եւ զմայրն մերԵւայ, նոյն արարիչն Աստուած աւրհնեսցէ դրախտս ձեր, զայգիս եւ զբուրաստան ձեր. ամէն: Պատճառ թէ շէն ու պայծառ լինի՝ ձեզ է պարծանք եւ ճոխութիւն. եւ թէ աղքատ եւ նուաստ, դարձեալ ձեզ է պակասութիւն: Ձեզանէ խնդիրք ունիմք, որ զայս աթոռս ի մտաց չի հանէք եւ անտես չառնէք. եւ դուք աւրհնեալ լիջիք յԱստուծոյ բարձրելոյն. ամէն:

Տ. Կ. Ես յաթոռակալ Մարտիրոս եպիսկոպոս վկա եմ այս բանիս:

Տ. Կ. Ես Համազա՛ եպիսկոպոս առաջնորդ Ս. ուխտին Փրկչական պական պատկերին վկայ եմ այս բանիս:

Տ. Կ. Ես Միքաէլ առաջնորդ Ս. ուխտին Աղչկուց վանացն, որ է նահատակ Ս. Ստեփանոս քահանային, վկայ եմ այս բանիս եւ նամակիս:

Տ. Կ. Ես Մանուէլ եպիսկոպոս առաջնորդ Ս. Աստուածածնին վկայ եմ այս նամակիս:

Տ. Կ. Ես Աստուածատուր եպիսկոպոս առաջնորդ Ս. ուխտիս Այրվանաց վկայ եմ այս նամակիս:

Այս հինգ վանաց առաջնորդս առաջի Աստուծոյ եւ սուրբ աթոռոյս դրանն՝ այս նամակիս համախոհ եմք այս բանիս. որ զԶաքարիա վարդապետն եւ Դաւիթ եպիսկոպոս՝ հազիւ կարացաք հաւանեցուցանել առ ձեզ գալոյ. այլ մարդոյ հրամանք չկա այդ տեղեացդ նուիրակ կամ իշխանութիւն առնելոյ. դոցանէ ի զատ այլ մարդ չընդունիք. Աստուած ըզձեզ աւրհնէ. Սուտ եւ խաբեբա մարդ շատ շուրջ գա. բայց ինչ մարդ որ զայս նամակս ու ձեր նշանն առ ձեզ բերէ՝ ըստոյգ եւ ճշմարիտ նուիրակն նա է:

Գրեցաւ սակաւ գիրս դուռն Ս. Էջմիածնա. Թվին ՌՀԹ, մայիս ամսոյ ի մէկն: