Թղթեր

Կամիմ յայսմ տախտակի կարճառօտ եւ համառօտ հատանել քեզ. քանզի սիրելի է քեզ միշտ ստորասութեամբ շատանալ եւ այն չափաւորական ըստ շարունակ քանակի ոչ հատմամբ, այլ ըստ տարորոշական յեղանակի եզրակացութիւն առնուլ: Ըստ ըղձման քո փափաքանաց տեսութեան մեզ տենչայիր. եւ ես ըղձանօք ուշ եդեալ յերկարագոյն ուղեգնացութենէ հասանել, իբրու նաւ ի ծփանաց ծառացեալ կոհակաց ալեաց ի նաւահանգիստ, յայդպիսիդ ժամանել, մինչ տակաւին Աթենայ իւրովն հարսնացեալն զարդու պերճ եւ պաճոյճ սաղարթանայր բոլորն իւրածին յոգնաբեղուն շարակայացեալ զարմիւ, տայր մեզ աչալուրջ իմն եւ սխրալի օգնականութիւն, եւ ընդարձակագոյն դրունս յամենայնի չուպարել ընթացիւք:

Ապա` մերձ առ Ծոփս յորջորջեալ յաշխարհ հուպ մերձ եղելոյ` հասանէ աժխոյժն խիզախմամբ իւրովն ճանջաճերմակ եւ սալասմբակն երիվարաւ մակաւասար մենամարտիկն այն եւ գոռոզն Պիսիդոն յայսպիսի հեծեալ. եւ ընդ ինքեան առեալ զքաջավազիկն երկնաչու եւ վրնջապապչեակ զքօշն քաղեան, աճապարեալ նահանջեաց զդէմ էառ. եւ Հեփեստոս ի փախուստ եղեալ հանդերձ Պռոմէդիւ: Բայց եւ կարծիս կասկածանաց եղեալ մեզ զգուշական բաղխոհութեամբ ի մերոց լրտեսաց, եթէ Կռօնոս զկնի դարանեալ հեծեալն յայծ եւ հօտ քաղին, անժամանակ իմն նախաբուրական պատահեաց մեզ: Յայսմանէ երկիւղեալ, իբրու զԲիւտիկացին այն Պիինքողոս, որ առ Պելոպանոսիւ զարհուրեալ յալեացն ծփմանց, բան կապեալ առ դիսն` ոչ երբէք ծովագնացութեամբ մակաշրջել փայտիւք: Ոչ հաւանիմ, ասէր, կարկատուն անօթիւք առ հզօրագոյն թագաւորս մտանել եւ ոչ վստահանամ երբէք ի սէր արքունի: Զայս դիւցազնական տաղ ստեղծեալ Պոռփիւռիփոնոս երգէր ի ճեմարանին Աքիւղեայ:

Այսբար իմասցիս եւ զմեզ ոչ վստահանալ ի լեառնդ Կազեղայ. մանաւանդ եթէ ի գալն յայսպիսի աւուրս ձմերայնոյ եւ սրբազան կրօնաւորացդ ելանել յիւրաքանչիւր խրճիթէ սակս ասպնջականութեան մեզ, տքնեալ տրտմին. եւ այսու պատճառանօք խնդրեմք աղօթս հանդերձ թողութեամբ, ողջ լե'ր:

Լու եղեւ մեզ ոմանց, եթէ Որփիս եհաս առ քեզ հանդերձ Ալիկատրացեաւն Եւնոմիոսիւ ընդ ինքեան ունելով զԱրիովն. բայց զարմանամ, եթէ զիա՞րդ ի Սիկիլիացւոց դարձեալ խաղաղութեամբ հասանէ, ոչ նախանձու ծովահեղձուկ ջրասուզեալ եւ ոչ կարօտացեալ ողորմութեան դլփնի, զոր ստանձնեալ արտաքս բերէր. եւ յԱթենա զանդրիսն այսպիսի առն ի տաճարին Ապողոնի կանգնեալ պարտ վարկանէին. եւ սակս երաժշտացն է բանս այնոցիկ, որք մերկ երգով զձկունսն խանծացուցանէին եւ զծառս կաղնիս, ուր եւ կամէին փոփոխէին, եւ որ այլ յաղագս սոցա առասպելաբանութիւնս, զոր մեք սակս Դանիէլի տարացոյց վարկաք: