Թղթեր

Ընկալայ զնռունս ոչ ի կաթլացն կարծեցելոցն արենէ Դիոնիսեայ, այլ ի բաղկացուցիչն զօրութենէ անբաղաբարն բարւոյ: Եւ զի պարսկական է անունն անար, ի հրապաշտութեանն պատուեալ յատրուշանին յորջորջեալ, յորմէ անարն կոչեցեալ սակս որակութեանն հրակերտ, կարմրահատ եւ հրահատ: Իսկ ստուգաբանեալ նուռնդ, ներմակագրեալն նուռն, կուռն, յոգնախումբ եւ միահամուռն ի միասին բաղկացութեան բազմահատեայ հարստութեամբ իբրու կուռն փոխադրեալ նոյն ներառասութեան: Զի կուռն իբրու բազում գտեալ այս ի գիր` փիւրն ի պէ, եւ կենն ի գիմ կամ ի քէ, հիւնն ի խէ յոչն ուղղախօսելոյ: Այսոքիկ են նռանցդ ներասութիւնք:

Այլ ինձ ոչ սակաւ եհաս հիացումն համարողութեանդ քո յերկրաչափականն համարձակելոյ մտանելդ եւ զմեզ շարժելդ: Ահա' զօրէն ճային Ոլոմպիանեայ կամ ասացեալն թէ ճանճն ճոխացեալ ճողոպրեալ կամեցաւ զճաշակս ի ծամելեաց առիւծուն, ի քուն զնա գտեալ. զոր, այսր անդր զագին գալարեալ, հողմահարիւր ի բաց մղեալ. եւ ոչ ոստուցեալ թռչունն արտակայիլ. ապա կռճեաց կեռեօքն կռփել. կոկորդակոփ կասեաց ընդ ժանեօքն. եւ ժպտեալ, զոմանս եթող կիսամահ ընդ ռնգունսն զերծեալք. զոր ի դատաստան մտեալ Ակկարովնեան ճանճիցն, ճենճերելով ճեմեալք ճոռոմաբանեն զճաշակաց առիւծուն. զոր ոչ ընկալեալ իրաւունսն ի Կրիտիսէն Կրետացի ասէ. Ճանճի'կ, ի ճոխ առիւծուց ծամելիս մի' մտաներ, յորժամ ի քուն մտանէ. եթէ ոչ` ճմլիս, ճոպճոպիս, շատ ճենճերաս. ի ծա~կն, ի փեթա~կն, ճանճի'կ, անդ տզզա', բզզա' եւ յարքունիսն մի' երթար:

Արդ` ի խո~ւղն, ի խո~ւցն, ի խրճի~թն, անդ սաղմոսէ'. նուագել ի ճեմարանսն մի' ճեպիք, եթէ ոչ` ճանճին պէս ճմլիք:

Այլ թուոյն իմաստք հնգից եօթն, եօթնեակն Աթենայ կուսածին յուղղոյն Արամազդայ Պիկկոսին, պատանի գոլով, ոչ ծնեալ եւ ոչ ծնիցեալ, ընդ Պիսիդոնայ մարտուցեալ, եւ ոսկեղէն ուռամբն բռնամարտիկ կոփոն մակ կառափին կարկատեալ, զխոնաւախոյզն վերջնանահանջ արարեալ խարդաւանօղ զծովայածուկն կապտօղ, որ մակ երկնի ծառացեալ, զծայրս ալեացն ծփէր, եւ զնիզակն ի տունկն ձիթենւոյ յեղափոխեալ ի դղեկին Ելլադայ յամուրն Ատտիկէի նախասացեալն Դիափկետեայ կանգնեալ, որ այժմ Աթեանս անուանի:

Բայց հնգիցս թիւ` զգայական հանճարոյ հուպ քեզ ծանուցեալ է, այլ ինչ յարամանեալ յեօթն անկիւնս պատկանին, որպէս եռանկիւնին ի քառանկիւնսն, եւ քառանկիւնս ի քուէն առաջին միով հոլովմամբ գտեալ զայտ հոյծ հարթութեամբ որակացեալ տրամադրեցաւ տիրապէս. շարժեցեալ, իսկ զեօթնից ոչ հոլովեաց: Ողջ լե'ր: