Տաղեր

Իմ մեղսասէր միտք ու մարմին,
Աւուրբք բազմօք կաս ի չարին,
Եկեալ եհաս օրս յետին.
Յորժամ ապա գաս ի բարին:

Սէր զաշխարհիս յոյժ սիրեցէր,
Զփառս սորին ընդգրկեցէր,
Զաստուծոյ սէրն յետ ձգեցէր.
Յորժամ ապա գաս ի բարին:

Որովայնի հետեւեցար
Եւ յղփութեամբ շուայտեցար,
Ժուժկալութեաց անփորձ գտար.
Յորժամ ապա գաս ի բարին:

Ւիւթականօք մոլորեցար,
Ագահութեամբ յոյժ կուրացար,
Յողորմութեանց ունայն գտար.
Յորժամ ապա գաս ի բարին:

Քաղցելոց հաց դու ո'չ ետուր,
Ծարաւելոց ո'չ ետուր ջուր,
Պատուիրանաց եղեր անլուր.
Յորժամ ապա գաս ի բարին:

Իգականաց յետս ընթացար,
Նետիւք նոցին խոցոտեցար,
Վիրօք չարեաց վարանեցար,
Յորժամ ապա գաս ի բարին:

Արբեցութեամբ յոյժ զեխացար,
Դանդաղական քնով լցար,
Ժամատեղաց խիստ ծուլացար,
Յորժամ ապա գաս ի բարին:

Սրբազնիւ կարգիւ օծար,
Գերաստիճան հրաւիրեցար,
Այլ պիղծ գործօք աղտեղացար.
Յորժամ ապա գաս ի բարին:

Է իրաւի զոր գրեցի,
ԵՌԾԻԿ թուին զիս մատնեցի,
Ես ինձ ոսոխ զայս ասացի.
Յորժամ ապա գաս ի բարին: