Տաղեր

Ի քո սիրուդ յագիլ երբէք, ե՞րբ իցէ, սէր իմ, եր՞բ իցէ,
Աւուրք կենաց իմոց անցեալ, ե՞րբ իցէ, սէր իմ, եր՞բ իցէ,
Թէպէտ գիտեմ զմահն առ իս, զի մերձ է, սէր իմ, զի մերձ է,
Բայց ոչ գիտեմ զժամանակս ե՞րբ իցէ, սէր իմ, եր՞բ իցէ:

Սաստիկ խոցեալ սիրով քոյին բնական, սէր իմ, բնական,
Աղէկիզեալ կսկծագին կոծական, սէր իմ, կոծական,
Մորմոքիմ զառ ի քէն շրջիլս ըղձական, սէր իմ, ըղձական,
Եւ ոչ գիտեմ զգալս առ քեզ, ե՞րբ իցէ, սէր իմ, ե՞րբ իցէ:

Ողբալով յամենայն ժամու հառաչեմ, սէր իմ, հառաչեմ,
Եւ թէ զիա՞րդ անտես ի քէն դադարեմ, սէր իմ, դադարեմ,
Աւաղելով զոր կորուսի, միշտ գոչեմ, սէր իմ, միշտ գոչեմ,
Թէ վերստին զայն գտանել ե՞րբ իցէ, սէր իմ, ե՞րբ իցէ:

Ւիւծեալ ի կարօտոյ սիրտ իմ գալարի, սէր իմ, գալարի,
Դառնալ անդրէն եւ գալ առ քեզ յօժարի, սէր իմ, յօժարի,
Տարփալով տեսութեան քոյին պատկերի, սէր իմ, պատկերի,
Հանապազօր աղաղակեմ` ե՞րբ իցէ, սէր իմ, ե՞րբ իցէ:

Քայքայեցան կեանք իմ, ամք իմ ի լալոյ, սէր իմ, ի լալոյ,
Զտիւ եւ զգիշեր անրջապէս խորհելոյ, սէր իմ, խորհելոյ,
Իսպառ-ըսպուռ լքաւ կարս իմ տեւելոյ, սէր իմ, տեւելոյ,
Ե՞րբ իցէ հայիլ ի քո դէմն, ե՞րբ իցէ, սէր իմ, ե՞րբ իցէ:

Ի ճանապարհ երկարական գնացի, սէր իմ, գնացի,
Եւ աչս քո անմխիթար լացուցի, սէր իմ, լացուցի,
Արդի իցէ թէ եւ ցամաքիլ յաւելցի, սէր իմ, յաւելցի,
Եւ տեսանել զքեզ բերկրեալ ե՞րբ իցէ, սէր իմ, ե՞րբ իցէ:

Արեկ, արեկ, ո'վ իմ սիրուն սիրելի, սէր իմ, սիրելի,
Կցորդ լեր ինձ, տառապելոյս փարելի, սէր իմ, փարելի,
Արժանացո սիրոյդ նախնոյ, նազելի, սէր իմ, նազելի,
Համբուրելով գրկախառնիլ ե՞րբ իցէ, սէր իմ, ե՞րբ իցէ:

Սարտուցելոյս ի քոյդ սիրոյ ըստենէ, սէր իմ, ըստենէ,
Փութանակի դարձն իմ անդրէն ըստիպէ, սէր իմ, ըստիպէ,
Մինչդեռ չիցեմ կապեալ մահու ստուերէ, սէր իմ, ստուերէ,
Փարիլ ի գիրկս տարփալոյդ, ե՞րբ իցէ, սէր իմ, ե՞րբ իցէ:

Էի ես խանդակաթ ի մէջ տագնապի, սէր իմ, տագնապի,
Ուշաթափեալ եւ պապակեալ ի տապի, սէր իմ, ի տապի,
Զովացո տեսութեամբդ, որ կայ ի կապի, սէր իմ, ի կապի,
Ի հանդիսի քում զայս ՃԱՌԵԼ ե՞րբ իցէ, սէր իմ, ե՞րբ իցէ: