Տաղեր

Ի բոլոր սրտէ մեղուցեալ մարմնոյս,
՚Ւ ի զօրութեան ախտացեալ հոգւոյս,
Առ քեզ բողոքեմ, որ ես տէր շնչոյս.
Ողորմեա հիքոյս,
Անօրինելոյս:

Սիրոյ աշխարհի մեղաց գերելոյս,
Ընչից եւ փառաց միշտ ծառայելոյս,
Առ քեզ հանապազ թիկունս դարձելոյս.
Ողորմեա հիքոյս,
Անօրինելոյս:

Որ եւ հեշտութեան ախտիւ մեռելոյս,
Նետիւք թշնամւոյն խոցեալ եղկելոյս,
Շնորհաց սրբութեանց թողեալ լքելոյս.
Ողորմեա հիքոյս,
Անօրինելոյս:

Ւիւծեալ ի լուսոյ վառարանս անլոյս,
Յիւղոյ պակասեալ լապտեր շիջելոյս,
Ըստ յիմար կուսից ինձ արտաքսելոյս.
Ողորմեա հիքոյս,
Անօրինելոյս:

Քանանու նման ինձ սեւացելոյս,
Հօր Ամօրհացւոյ եւ մօր` Քետացւոյս,
Խորթացեալս բարուք, գարշութեան որդւոյս.
Ողորմեա հիքոյս,
Անօրինելոյս:

Ի տունկ ծառոց եմ ունայնաբոյս,
Թէպէտ ձիթենի, այլ պտղակորոյս,
Յայտնի ներկայիւս, յապայս տունկս անյոյս.
Ողորմեա հիքոյս,
Անօրինելոյս:

Անառակ որդի նոր իմն յայտնելոյս,
Հայրենի բարեաց յոյժ տարագրելոյս,
Խոզարած տղմօք թշուառացելոյս.
Ողորմեա հիքոյս,
Անօրինելոյս:

Սրով երկսայրի խղխայթեալ հոգւոյս,
Անբժշկելի տարակուսելոյս,
Ահիւ օրհասին տագնապեցելոյս.
Ողորմեա հիքոյս,
Անօրինելոյս:

Է' վաթսուն եւ վեց ամք տառապելոյս,
ՄԻՋԻԴ Է թիւն զայս բան գրելոյս,
Սկսայց ասել ի հետէ այժմոյս.
Ողորմեա հիքոյս,
Անօրինելոյս: