Տաղեր

Իմ սիրուն պիւլպիւլ անման,
Քաղցրաձայն թռչուն պատուական,
Եղանակես երգ զանազան.
Ա'յ սիրուն պիւլպիւլ աննման,
Քան զամէն թռչուն պատուական:

Սիրուն վարդ, կարմիր, քաղցրատես,
Գունով գեղեցիկ, պայծառ ես,
Ամէն ծաղկանց թագաւոր ես.
Ա'յ սիրուն վարդիկ աննման
Քան զամէն ծաղկանց պատուական:

Ո'վ սիրուն պիւլպիւլ զիա՞րդ կաս,
Վարդին կարօտուն քանի՞ լաս,
Ճռվռալով կու հեծեծաս:
Ա'յ սիրուն պիւլպիւլ աննման,
Քան զամէն թռչուն պատուական:

Ւիւսապսակեալ բուրաստան
Հոտով անուշիկ, սխրական,
Բժշկես դու զցաւս ամենայն.
Ա'յ սիրուն վարդիկ աննման
Քան զամէն ծաղկանց պատուական:

Քունն եղեր հարամ աչերուս,
Գիշեր-ցորեկ զարթուն մնալուս,
Ճար չմնաց համբերելուս.
Ա'յ սիրուն պիւլպիւլ աննման,
Քան զամէն թռչուն պատուական:

Իմ գեղեցիկ վարդ անուշիկ,
Երբ կու տեսնեմ զքո երեսիկ,
Եկ մեր այգին, եղիր հիւրիկ.
Ա'յ սիրուն վարդիկ աննման,
Քան զամէն ծաղկանց պատուական:

Աւետիս տամ ես պիւլպիւլին,
Սիրո տէր խղճուկ թռչունին,
Ամիսն եկաւ գալու վարդին.
Ա'յ սիրուն պիւլպիւլ աննման,
Քան զամէն թռչուն պատուական:

Սիրով կարօտիմ առ քեզ վարդ,
Ցանկայ քո տեսուն ամէն մարդ,
Համայն ծաղկանց պարծանք եւ զարդ.
Ա'յ սիրուն վարդիկ աննման
Քան զամէն ծաղկանց պատուական:

Է'յ սիրուն պիւլպիւլ մեզ ասա,
ԷՌԾԻԿ թուին հետ զիս յիշեա,
Տէր, ողորմեա եղանակեա.
Ա'յ սիրուն պիւլպիւլ աննման,
Քան զամէն թռչուն պատուական: